ଉମରକୋଟ ୧୪।୬: ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ବେଲଗାଁ ପଞ୍ଚାୟତର ମୋହଣ୍ଡି ଗ୍ରାମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଘରେ କେହି ନଥିବା ବେଳେ ନିଜ ଘର ପଛପଟରେ ଥିବା ଆବର୍ଜନା କୁଣ୍ଡର ପାଣିରେ ପଡି ଏକ ବର୍ଷର ଶିଶୁପୁତ୍ରର ମୃତ୍ୟୁ ହୋଇଛି ।
ସୂଚନାଯୋଗ୍ୟ ଯେ, ମୋହଣ୍ଡି ଗ୍ରାମର ବୁଦୁରାମ ଗଣ୍ଡ ସବୁଦିନ ଭଳି ମଙ୍ଗଳବାର ମଧ୍ୟ ମାଲିକଙ୍କ ଟ୍ରାକ୍ଟର ନେଇ ଜମିକୁ କାମ କରିବା ପାଇଁ ଯାଇଥିଲେ । ସ୍ତ୍ରୀ ଫୁଲ ଗଣ୍ଡ ସହ ପୁଅ ଝିଅମାନେ ଘରେଥିଲେ । ତେବେ ଘରୁ କିଛି ଦୂରରେ ଥିବା ନଳକୂପରୁ ପାଣି ଆଣିବା ପାଇଁ ଫୁଲ ଯାଇଥିବା ବେଳେ ୬ବର୍ଷର ବଡ଼ ଝିଅ ରାଜ କୁମାରୀ ଓ ସାନ ଭାଇ ପ୍ରକାଶ ଘରେ ଥିଲେ । ତେବେ ପ୍ରକାଶ ଖେଳୁଥିବା ସମୟରେ ଘର ପଛପଟରେ ଥିବା ବାସନ ମଜା ପାଣି ଜମୁଥିବା ଆବର୍ଜନା କୁଣ୍ଡରେ ଯାଇ ପଡିଯାଇଥିଲା । ମା’ ଫୁଲ ପାଣି ନେଇ ଘରକୁ ଆସିବା ପରେ ଦୁହେଁ ଛୁଆ ନଥିବା ଦେଖି ଖୋଜାଖୋଜି କରିଥିଲେ ।
ଶେଷରେ ଘର ପଛପଟେ ଥିବା ଆବର୍ଜନା ପାଣି କୁଣ୍ଡରେ ଶିଶୁପୁତ୍ର ପଡିଥିବା ଦେଖି ତୁରନ୍ତ କୁଣ୍ଡରୁ ବାହାର କରିବା ସହ ସ୍ଥାନୀୟ ଆମ୍ବୁଲାନ୍ସକୁ ଫୋନ୍ କରିଥିଲେ। ଆମ୍ବୁଲାନ୍ସ ଆସିବାରେ ବିଳମ୍ବ ହେବାରୁ ଏକ ବାଇକ୍ ଯୋଗେ ଝରିଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ତେବେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପ୍ରସାର ହେବା ପରେ ମୋହଣ୍ଡି ଗ୍ରାମରେ ଶୋକର ଛାୟା ଖେଳିଯାଇଛି ।
