ନୂଆଦିଲ୍ଲୀ ୨୦/୦୯: ଖେଳାଳିଙ୍କୁ ଅସମ୍ମାନ । କାହିଁକି ଏତେ ହତାଦାର । ଏକଥା ଆମେ କହୁନୁ ବରଂ ଏଇ ଦୃଶ୍ୟ ବୟାନ କରୁଛି । ଉତ୍ତର ପ୍ରଦେଶରୁ ନଜର ଆସିଥିବା ଏ ଚିତ୍ର ଏମିତି କହିବାକୁ ବାଧ୍ୟ କରୁଛି ।
ଉତ୍ତରପ୍ରଦେଶର ସହାରନପୁରର ଡ଼.ଭିମରାଓ ସ୍ପୋର୍ଟସ୍ ଷ୍ଟାଡିୟମ୍ ରେ ଆୟୋଜିତ କବାଡ଼ି ପ୍ରତିଯୋଗିତା ବେଳେ ଖେଳାଳିମାନଙ୍କୁ ଟଏଲେଟ୍ ଭିତରେ ପ୍ରସ୍ତୁତ ହୋଇଥିବା ଖାଦ୍ୟ ପରଷା ଯାଇଥିଲା । ଯାହାର ଏକ ଭିଡ଼ିଓ ସୋସିଆଲ୍ ମିଡ଼ିଆରେ ଖୁବ ଭାଇରାଲ୍ ହେଉଛି । ଯାହାକୁ ନେଇ ସବୁଠି ଚର୍ଚ୍ଚା କରାଯାଉଛି । ଘଟଣାକୁ ନେଇ ବସିଛି ଯାଞ୍ଚ୍ କମିଟି । ଏହାସହ କ୍ରୀଡ଼ା ଅଧିକାରୀ ଅନିମେସ୍ ସକ୍ସେନାଙ୍କୁ ବି ନିଲମ୍ୱିତ କରାଯାଇଛି ।
ସୂଚନା ଥାଉକି, ଷ୍ଟାଡ଼ିୟମରେ ଜୁନିୟର୍ ବାଳିକା କବାଡ଼ି ପାଇଁ ୩ ଦିନିଆ ପ୍ରତିଯୋଗିତା ଆୟୋଜନ କରାଯାଇଥିଲା । ରାଜ୍ୟସ୍ତରର ଏହି କବାଡ଼ି ପ୍ରତିଯୋଗିତା ସେପ୍ଟେମ୍ବର ୧୬ ରୁ ୧୮ ତାରିଖ ପର୍ଯ୍ୟନ୍ତ ଚାଲିଥିଲା । ଯେଉଁଥିରେ ସାମିଲ ହୋଇଥିଲେ ୧୭ ଜଣ ଟିମ୍ । ୨୦୦ ରୁ ଅଧିକ ଲୋକଙ୍କ ପାଇଁ ପ୍ରସ୍ତୁତ ହୋଇଥିଲା ଖାଦ୍ୟ । ତେବେ ଏହି ସବୁ ଖାଦ୍ୟ ପ୍ରସ୍ତୁତ ହୋଇଥିଲା ଟଏଲେଟରେ ।
ଖେଳାଳିଙ୍କ ପାଇଁ ଖାଲି ଟଏଲେଟରେ ଖାଇବା ପରଷା ଯାଇନଥିଲା । ଆହୁରି ମଧ୍ୟ ଅନେକ ଖେଳାଳି ରୁଟି ବି ପାଇନଥିଲେ । ଫଳରେ ଖେଳାଳି ସାଲାଡ ଖାଇ ପେଟ ଭର୍ତ୍ତି କରିଥିଲେ । ଯେଉଁସବୁ ଖାଦ୍ୟ ପ୍ରସ୍ତୁତ ହୋଇଥିଲା ସେସବୁକୁ ଶୌଚାଳୟରେ ରଖାଯାଇଥିଲା । ଫଳରେ ଦୁର୍ଗନ୍ଧ ହେତୁ ସେଠାରେ ଠିଆ ହେବା ମଧ୍ୟ କଷ୍ଟକର ହୋଇପଡୁଥିଲା ।
ସେପଟେ କ୍ରୀଡା ଅଧିକାରୀ ଅନିମେଶ ସକ୍ସେନା ଏନେଇ ରଖିଛନ୍ତି ସଫେଇ । ସେ କହିଛନ୍ତି ଷ୍ଟାଡିୟମରେ ନିର୍ମାଣ କାର୍ଯ୍ୟ ଚାଲିଛି । ଏହି କାରଣରୁ ଏଠାରେ କୌଣସି ସ୍ଥାନ ନଥିଲା । ଖୋଲା ସ୍ଥାନରେ ଖାଦ୍ୟ ପ୍ରସ୍ତୁତ କରାଯାଉଥିଲା । ବର୍ଷା ହେତୁ ଖାଦ୍ୟ ଶୌଚାଳୟରେ ରଖାଯାଇଥିଲା । ଚାଉଳ ମଧ୍ୟ ଭଲ ନଥିଲା । ଫେରାଇ ଦିଆଯାଇଥିଲା । ପରେ ଚାଉଳ କିଣାଯାଇ ଅଣା ରନ୍ଧାଯାଇଥିଲା । ଯେଉଁଥିରେ ବିଳମ୍ୱ ହୋଇଥିଲା । ଫଳରେ ଭାତ ଟିକିଏ କଞ୍ଚା ରହିଥିଲା ।
