କାନପୁର: ସାଙ୍ଗ ହୋଇ ସମସ୍ତେ କ୍ରିକେଟ ଖେଳୁଥିଲେ | ତେବେ ଆଉଟ ହେବାପରେ ବ୍ୟାଟ୍ସମ୍ୟାନଙ୍କ ମୁଣ୍ଡକୁ ପିତ୍ତ ଚଢ଼ିଗଲା ଆଉ ବୋଲରଙ୍କ ତଣ୍ଟି ଚିପି ହତ୍ୟା କଲେ | ଉତ୍ତରପ୍ରଦେଶର କାନପୁରରେ ଏଭଳି ଏକ ଅଭାବନୀୟ ଘଟଣା ଘଟିଛି | ମିଳିଥିବା ସୂଚନା ମୁତାବକ କ୍ରିକେଟ୍ ଖେଳିବା ବେଳେ ବ୍ୟାଟ୍ସମ୍ୟାନ୍ ଏବଂ ବୋଲରଙ୍କ ମଧ୍ୟରେ ବିବାଦ ଲାଗି ରହିଥିଲା। ଏହି ସମୟରେ କ୍ରୋଧିତ ହୋଇ ବ୍ୟାଟ୍ସମ୍ୟାନ୍ ବୋଲରଙ୍କ ତଣ୍ଟି ଚିପି ହତ୍ୟା କରିଥିଲେ | ଏହା ପରେ ମ୍ୟାଚ୍ ଖେଳୁଥିବା ସାଥୀମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ | ଏବାବଦରେ ସମ୍ପର୍କୀୟମାନେ ସୂଚନା ପାଇ ଶୀଘ୍ର ଯୁବକଙ୍କୁ ଘାଟମପୁର ମେଡିକାଲକୁ ନେଇଥିଲେ | ଯେଉଁଠାରେ ଡାକ୍ତରମାନେ ଯୁବକଙ୍କୁ ମୃତ ବୋଲି ଘୋଷଣା କରିଥିଲେ।
ସୂଚନା ମୁତାବକ କାନପୁରର ଘାଟମପୁରର ମୋହନ ସିଂ କହିଛନ୍ତି ଯେ ତାଙ୍କ ୧୫ ବର୍ଷର ପୁଅ ସଚିନ୍ ପଡ଼ିଆରେ ନିଜ ସାଙ୍ଗମାନଙ୍କ ସହ କ୍ରିକେଟ୍ ମ୍ୟାଚ୍ ଖେଳୁଥିଲେ। ସଚିନ ବୋଲିଂ କରୁଥିବାବେଳେ ସେହି ଗାଁର କିଶୋର(୧୭) ବ୍ୟାଟିଂ କରୁଥିଲେ | ତେବେ ସଚିନଙ୍କ ବଲରେ କିଶୋର ଆଉଟ ହୋଇଯାଇଥିଲେ | ତେବେ କିଶୋର ଆଉଟ ହୋଇନାହାନ୍ତି ବୋଲି କହିଥିଲେ | ଏହାକୁ ନେଇ ସଚିନ ଓ କିଶୋରଙ୍କ ମଧ୍ୟରେ ବିବାଦ ଦେଖାଦେଇଥିଲା | ବିବାଦ ଏତେ ବଢିଯାଇଥିଲା ଯେ କିଶୋର ରାଗିଯାଇ ସଚିନଙ୍କ ତଣ୍ଟି ଚିପି ହତ୍ୟା କରିଥିଲେ ।
ଏହା ପରେ କିଶୋର ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏହି ବିବାଦ ସମ୍ପର୍କରେ ଗ୍ରାମବାସୀ ପରିବାର ଲୋକଙ୍କୁ ସୂଚନା ଦେଇଥିଲେ। ଘଟଣାସ୍ଥଳରେ ପହଞ୍ଚିଥିବା ସମ୍ପର୍କୀୟମାନେ ତୁରନ୍ତ ସଚିନଙ୍କୁ ଆମ୍ବୁଲାନ୍ସ ସାହାଯ୍ୟରେ ଘାଟମପୁର ମେଡିକାଲକୁ ନେଇଥିଲେ। ଯେଉଁଠାରେ ଡାକ୍ତରମାନେ ସଚିନଙ୍କୁ ମୃତ ବୋଲି ଘୋଷଣା କରିଥିଲେ। ଏହି ପ୍ରସଙ୍ଗରେ ପୁଲିସ କହିଛି ସଚିନଙ୍କ ମୃତଦେହ ପୋଷ୍ଟମର୍ଟମ ପାଇଁ ପଠାଯାଇଛି। ଘଟଣାର ତଦନ୍ତ କରାଯାଉଛି।
