ଜଗତସିଂହପୁର ୦୧।୦୫ : ଯୁବକଙ୍କ ସନ୍ଦେହଜନକ ମୃତ୍ୟୁ। ମୃତ ଯୁବକ ହେଲେ ବୃନ୍ଦାବନ କଲୋନୀର ପ୍ରହ୍ଲାଦ ଗେଡିଙ୍କ ପୁଅ ମନୋରଞ୍ଜନ ଗେଡି। ଜଗତସିଂହପୁର ଜିଲ୍ଲା ପାରାଦୀପ ବୃନ୍ଦାବନ କଲୋନୀର ଘଟଣା ।
ପରିବାର ଲୋକଙ୍କ ଅଭିଯୋଗ ଅନୁସାରେ ଶନିବାର ସନ୍ଧ୍ୟାରେ ଅଠରବାଙ୍କୀ ନିକଟରୁ ସ୍ଥାନୀୟ ଅଭୟଚାନ୍ଦ ପୁର ଥାନା ପୋଲିସ ମନୋରଞ୍ଜନଙ୍କୁ କୌଣସି ଏକ ଅଭିଯୋଗରେ ଗିରଫ କରି ଥାନାକୁ ଆଣିଥିଲା । ପୋଲିସ ପୁଅକୁ ହାଜତରେ ପିଟି ପିଟି ମାରି ଦେଇ ଥିବାର ମୃତକଙ୍କ ତାଙ୍କ ବାପା ଅଭିଯୋଗ କରିବା ସହ ଏହାର ତଦନ୍ତ ଦାବି କରିଛନ୍ତି। ତେବେ ମୃତ୍ୟୁର ସଠିକ କାରଣ ଅସ୍ପଷ୍ଟ ରହି ଥିବା ବେଳେ ପୋଲିସ କିଛି କହିବା ପାଇଁ ମନା କରିଦେଇଛି। ମୃତ ମନୋରଞ୍ଜନ ପାରାଦୀପ ସ୍ଥିତ ପିଆଇସିଟିରେ ଶ୍ରମିକ ଭାବରେ କାମ କରନ୍ତି ।
ଅନ୍ୟପକ୍ଷରେ ମନୋରଞ୍ଜନଙ୍କର ବାଇକ ଦୁର୍ଘଟଣାରେ ମୃତ୍ୟୁ ଘଟିଥିବା ସ୍ଥାନୀୟ ଜଣେ ଶ୍ରମିକ ନେତା ସଫେଇ ଦେଇଛନ୍ତି । ମୃତଦେହକୁ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟରୁ ଅଣାଯାଇ ରାତି ୨ଟାରେ ବ୍ୟବଚ୍ଛେଦ କରା ଯାଇଥିବାର ଜଣାଯାଇଛି । ଏତେ ରାତିରେ ତରବରିଆ ଭାବରେ କାହିଁକି ଶବ ବ୍ୟବଛେଦ କରା ଗଲା ତାକୁ ନେଇ ସନ୍ଦେହ ଅଧିକ ଘନୀଭୂତ ହୋଇଛି । ତେବେ ମନୋରଞ୍ଜନଙ୍କର ହାଜତରେ ମୃତ୍ୟୁ ହୋଇଛି ନା ଦୁର୍ଘଟଣା ଜନିତ ତାର ସଠିକ ତଦନ୍ତ ହେବାକୁ ସାଧାରଣରେ ଦାବି ହେଉଛି।
