ଜି.ଉଦୟଗିରି ୧୪/୧୦: କନ୍ଧମାଳରେ ପୁଣି ଲଜ୍ଜା । କଳିଙ୍ଗା ଘାଟିରେ ଜଣେ ଦିବ୍ୟାଙ୍ଗ ମହିଳାଙ୍କୁ ଟେକି ନେଇ ଦୁଷ୍କର୍ମ ଅଭିଯୋଗ । ଜି.ଉଦୟଗିରି ଆଦର୍ଶ ଥାନାରେ ମହିଳାଙ୍କ ସ୍ୱାମୀ ଏନେଇ ଲିଖିତ ଅଭିଯୋଗ ଦେଇଛନ୍ତି ।
ଫୁଲବାଣୀ ଅଞ୍ଚଳର ଜଣେ ମହିଳା କଳିଙ୍ଗା ବୁଲି ଆସିଥିଲେ । ସେଠାରୁ ସେ କଳିଙ୍ଗା ଘାଟିର ଅନ୍ଧାରୀ କୋଟି ପାଖକୁ ଚାଲି ଚାଲି ଆସିଥିଲେ । ତେବେ ସେଠାରେ ଦୁଇ ଜଣ ଅଜଣା ଯୁବକ ତାଙ୍କୁ ଟେକି ନେଇ ଦୁଷ୍କର୍ମ କରି ରାସ୍ତା କଡ଼ରେ ଛାଡି ଚାଲିଯାଇଥିଲେ । ପରେ ଜି.ଉଦୟଗିରି ପୋଲିସ ୧୦୮ ଆମ୍ୱୁଲାନ୍ସ ଯୋଗେ ଉଦ୍ଧାର କରି ଆଣି ଫୁଲବାଣୀ ପଠାଇଥିଲେ ।
ମହିଳା ଜଣକ ମାନସିକ ବିକୃତ ହୋଇଥିବା ଯୋଗୁଁ ସେ କିଛି କହିପାରି ନଥିଲେ । ପରେ ମହିଳାଙ୍କ ସ୍ୱାମୀ ଏ ବିଷୟରେ ଜାଣିବା ପରେ ଜି. ଉଦୟଗିରି ଥାନାରେ ଏକ ଲିଖିତ ଅଭିଯୋଗ ଦେଇଛନ୍ତି । କିନ୍ତୁ ଘଟଣା ଘଟିଥିବା ସ୍ଥାନଟି ଭଞ୍ଜନଗର ଅଞ୍ଚଳରେ ଆସୁଥିବାରୁ କେସ୍ଟି ଭଞ୍ଜନଗର ପୋଲିସ ଏହାର ତଦନ୍ତ ଆଗକୁ ନେବ ବୋଲି ଜି.ଉଦୟଗିରି ଥାନା ଅଧିକାରୀ ସୂଚନା ଦେଇଛନ୍ତି ।
