ନୂଆଦିଲ୍ଲୀ ୦୫/୦୩: ଅଷ୍ଟ୍ରେଲିଆର ମହାନ ବୋଲର ଶେନ ଓ୍ୱର୍ଣ୍ଣ ଆଉ ନାହାଁନ୍ତି । ଶୁକ୍ରବାର ହୃଦଘାତରେ ତାଙ୍କର ମୃତ୍ୟୁ ହୋଇଛି । ଯାହାକୁ ନେଇ ସାରା ବିଶ୍ୱର କ୍ରିକେଟର ଓ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରିଛନ୍ତି । ଶନିବାର ଯେତେବେଳେ ଭାରତ ଓ ଶ୍ରୀଲଙ୍କା ମଧ୍ୟରେ ଟେଷ୍ଟ୍ ସିରିଜର ଦ୍ୱିତୀୟ ଦିନ ଖେଳ ଆରମ୍ଭ ହୋଇଥିଲା, ଟିମ୍ ସଦସ୍ୟ ହାତରେ କଳାପଟି ବାନ୍ଧିଥିବା ଦେଖିବାକୁ ମିଳିଥିଲା ।
ଦ୍ୱିତୀୟ ଦିନ ଖେଳ ଆରମ୍ଭ ହେବା ପରେ ଉଭୟ ଭାରତ ଓ ଶ୍ରୀଲଙ୍କା ଖେଳାଳି ଦୁଇ ମିନିଟ୍ ଧରି ନିରବ ରହିଥିଲେ । ଏହାସହ ଖେଳାଳି ହାତରେ କଳା ପଟି ବାନ୍ଧିଥିଲେ । ଏପରି ଭାବେ ସେମାନେ ଓ୍ୱର୍ଣ୍ଣଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ।
ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ଓ୍ୱର୍ଣ୍ଣଙ୍କ ଦେହାନ୍ତରେ ଇମୋଶନାଲ ମେସେଜ ଦେଇଛନ୍ତି । ବିସିସିଆଇ ତରଫରୁ ରୋହିତଙ୍କ ଏକ ଭିଡିଓ ସେୟାର କରାଯାଇଛି । ଏଥିରେ ରୋହିତ କହୁଛନ୍ତି ଯେ, ଓ୍ୱର୍ଣ୍ଣଙ୍କ ଦେହାନ୍ତ ଖବର ଶୁଣି ସେ ଖୁବ୍ ମର୍ମାହତ ହୋଇଛନ୍ତି । ଏହା କ୍ରିକେଟ ଜଗତ ପାଇଁ ବହୁତ ବଡ ଝଟ୍କା ଅଟେ । ଯୁବ ଖେଳାଳିଙ୍କୁ ପ୍ରେରଣା ଦେଉଥିଲେ ଓ୍ୱର୍ଣ୍ଣ ବୋଲି କହିଛନ୍ତି ରୋହିତ ।
