ଜେନେଭା/ନୂଆଦିଲ୍ଲୀ, ୨୮ା୧୨: ମହାମାରୀ କରୋନାର ନୂଆ ଭାରିଏଣ୍ଟ ଓମିକ୍ରୋନ୍ ଏବେ ସାରା ବିଶ୍ୱକୁ ଚିନ୍ତାରେ ପକାଇ ଦେଇଛି । ବିଶ୍ୱର ଅନେକ ଦେଶରେ ଓମିକ୍ରନ୍ ସଂକ୍ରମିତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଥିବାରୁ ସେଠାରେ କରୋନା କଟକଣାକୁ ପୁଣିଥରେ କଡ଼ାକଡ଼ି କରାଯାଇଛି । ଏହାରି ମଧ୍ୟରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲୁଏଚ୍ଓ) ପକ୍ଷରୁ ବୁଧବାର ଏକ ବିବୃତ୍ତି ଜାରି କରାଯାଇ କୁହାଯାଇଛି ଯେ ଓମିକ୍ରନ୍ ଭାରିଏଣ୍ଟର ବିପଦ ଏବେ ବଢ଼ି ବଢ଼ି ଚାଲିଛି । ଦିନକୁ ଦିନ ଭୟଙ୍କର ହେଉଛି ଓମିକ୍ରନ୍ । ଗତ ସପ୍ତାହରେ ବିଶ୍ୱସ୍ତରରେ କୋଭିଡ୍-୧୯ ମାମଲାରେ ୧୧ ପ୍ରତିଶତ ବୃଦ୍ଧି ରେକର୍ଡ କରାଯିବା ପରେ ଡବ୍ଲ୍ୟୁଏଚ୍ଓ ପକ୍ଷରୁ ଏପରି ବିବୃତ୍ତି ଜାରି କରାଯାଇଛି ।
କୋଭିଡ୍-୧୯ର ସାପ୍ତାହିକ ଅପଡେଟ୍ରେ ଡବ୍ଲୁଏଚ୍ଓ ପକ୍ଷରୁ କୁହାଯାଇଛି ଯେ ଅନେକ ରାଷ୍ଟ୍ରରେ କୋଭଡ଼ି-୧୯୯ ମାମଲାର ଦ୍ରୁତ ଅଭିବୃଦ୍ଧି ପଛରେ ଓମିକ୍ରନ୍ ଭାରିଏଣ୍ଟ ରହିଛି । କେତେକ ରାଷ୍ଟ୍ରରେ ଓମିକ୍ରନ୍ ଭାରିଏଣ୍ଟ ସଂକ୍ରମିତଙ୍କ ସଂଖ୍ୟା ସେଠାରେ ପୂର୍ବରୁ ଥିବା ଡେଲ୍ଟା ଭାରିଏଣ୍ଟ ସଂକ୍ରମିତଙ୍କ ସଂଖ୍ୟାକୁ ଅତିକ୍ରମ କରିସାରିଲାଣି । ତେଣୁ ଏଥିରୁ ସ୍ପଷ୍ଟ ପ୍ରମାଣ ମିଳୁଛି ଯେ ଡେଲ୍ଟା ଭାରିଏଣ୍ଟ ତୁଳନାରେ ଓମିକ୍ରନ୍ ଭାରିଏଣ୍ଟ ଦ୍ରୁତ ଗତିରେ ସଂକ୍ରମଣ କରାଉଛି ବୋଲି ଡବ୍ଲ୍ୟୁଏଚ୍ଓ କହିଛି । ବ୍ରିଟେନ୍, ଆମେରିକା ଭଳି ରାଷ୍ଟ୍ରରେ ଓମିକ୍ରନ୍ ଭାରିଏଣ୍ଟ ଦ୍ରୁତ ଗତିରେ ବ୍ୟାପୁଛି । ଏହି ଦେଶଗୁଡ଼ିକରେ ଏବେ ଓମିକ୍ରନ୍ ଅଧିକ ପ୍ରଭାବଶାଳୀ ଭାରିଏଣ୍ଟ ହୋଇ ସାରିଲାଣି ବୋଲି ଡବ୍ଲ୍ୟୁଏଚ୍ଓ ପକ୍ଷରୁ ଏହି ରିପୋର୍ଟରେ ଦର୍ଶାଯାଇଛି । ତେବେ ଓମିକ୍ରନ୍ର ଗମ୍ଭିରତା ସମ୍ପର୍କରେ ଜାଣିବାକୁ ଏବେ ଅଧିକ ଗବେଷଣା ଓ ତଥ୍ୟ ବିଶ୍ଲେଷଣର ଆବଶ୍ୟକତା ଥିବା ଡବ୍ଲ୍ୟୁଏଚ୍ଓ ରିପୋର୍ଟରେ ଦର୍ଶାଯାଇଛି । କୋଭିଡ୍ରେ ପୂର୍ବରୁ ଆକ୍ରାନ୍ତ ଲୋକଙ୍କ ଉପରେ ଓମିକ୍ରନ୍ କ’ଣ ପ୍ରଭାବ ପକାଉଛି ତାହା ମଧ୍ୟ ଅନୁଶୀଳନ କରାଯାଉଛି ବୋଲି ଡବ୍ଲ୍ୟୁଏଚ୍ଓ କହିଛି ।
