ଭୁବନେଶ୍ବର ୪।୮: ଭଡାଘରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ଭୁବନେଶ୍ବର ସୁନ୍ଦରପଦା ସ୍ଥିତ ବେହେରା ସାହିରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ଏୟାରଫିଲ୍ଡ ଥାନା ପୋଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଛି ।
ସୂଚନାଯୋଗ୍ୟ ଯେ, ଭୁବନେଶ୍ବର ଏୟାର ଫିଲ୍ଡ ଥାନା ଅନ୍ତର୍ଗତ ସୁନ୍ଦରପଦା ବେହେରା ସାହିର ଏକ ଭଡା ଘରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ ଯୁବକ ଜଣଙ୍କ ଅଜିତ କୁମାର ବାରିକ ବୋଲି ଜଣାପଡିଛି । ଅଜିତ ଗତ ୨ ବର୍ଷ ହେବ ଏଠି ଭଡାରେ ରହୁଥିଲେ । ତେବେ ବୁଧବାର ରାତିରେ ଯୁବକଙ୍କ ମୃତଦେହ ଘରେ ଝୁଲିଥିବା ଘର ମାଲିକ ଦେଖିଥିଲେ । ପରେ ଏ ନେଇ ଘର ମାଲିକ ପୋଲିସକୁ ଖବର ଦେଇଥିଲେ ।
ତେବେ ବୁଧବାର କୌଣସି ଘଟଣାକୁ ନେଇ କିଛି ଯୁବକ ଅଜିତଙ୍କ ଘରେ ପାଟିତୁଣ୍ଡ କରିଥିଲେ । ଏହାର କିଛି ସମୟ ପରେ ଅଜିତଙ୍କ ମୃତଦେହ ଓଢଣୀରେ ବନ୍ଧା ଅବସ୍ଥାରେ ଝୁଲିଥିବା ଦେଖିବାକୁ ମିଳିଥିଲା ।
