ନୂଆଦିଲ୍ଲୀ: ଜମିଜମା ରେକର୍ଡ ଓ ପଂଜୀକରଣରେ ଡିଜିଟାଇଜେସନ ବ୍ୟବସ୍ଥା ଲାଗୁ କରିବାରେ ଓଡ଼ିଶାକୁ ଜାତୀୟ ସ୍ତରରେ ସ୍ବୀକୃତି ମିଳିଛି। ଡିଜିଟାଲ ଇଣ୍ଡିଆ ଲ୍ୟାଣ୍ଡ ରେକର୍ଡସ ଆଧୁନିକୀକରଣ ଯୋଜନା କାର୍ଯ୍ୟାନ୍ବୟନରେ ସଫଳତା ପାଇଁ ରାଜ୍ୟର ୧୯ଟି ଜିଲ୍ଲା ଯଥା ଅନୁଗୁଳ, ବୌଦ୍ଧ, ବରଗଡ଼, ଭଦ୍ରକ, ଦେବଗଡ଼, ଢେଙ୍କାନାଳ, ଗଜପତି, ଗଂଜାମ, ଜଗତସିଂହପୁର, ଯାଜପୁର, କେନ୍ଦ୍ରାପଡ଼ା, କେନ୍ଦୁଝର, ଖୋର୍ଦ୍ଧା, କୋରାପୁଟ, ନବରଙ୍ଗପୁର, ନୟାଗଡ଼, ନୂଆପଡ଼ା, ରାୟଗଡ଼ା ଓ ସମ୍ବଲପୁରକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମର୍ଯ୍ୟାଦାଜନକ ଭୂମି ସମ୍ମାନ-୨୦୨୩ରେ ସମ୍ମାନିତ କରିଛନ୍ତି।
ଆଜି ବିଜ୍ଞାନ ଭବନରେ କେନ୍ଦ୍ର ଗ୍ରାମୀଣ ବିକାଶ ମନ୍ତ୍ରାଳୟ ପକ୍ଷରୁ ଆୟୋଜିତ ଭୂମି ସମ୍ମାନ ପ୍ରଦାନ ସ୍ବତନ୍ତ୍ର କାର୍ଯ୍ୟକ୍ରମରେ ରାଷ୍ଟ୍ରପତି ଓଡ଼ିଶାର ୧୯ଟି ଜିଲ୍ଲା ସମେତ ଦେଶର ୮ଟି ରାଜ୍ୟର ୬୮ ଜିଲ୍ଲାକୁ ଉକ୍ତ ସମ୍ମାନ ପ୍ରଦାନ କରିଥିଲେ। ଓଡ଼ିଶାରୁ ପୁରସ୍କୃତ ୧୯ଟି ଜିଲ୍ଲାରୁ ନୂଆପଡ଼ା ଓ ରାୟଗଡ଼ାର ଜିଲ୍ଲାପାଳ ଆଜି ରାଷ୍ଟ୍ରପତିଙ୍କ ଠାରୁ ପୁରସ୍କାର ଗ୍ରହଣ କରିଥିବାବେଳେ ବଳକା ୧୭ଟି ଜିଲ୍ଲାର ଏଡିଏମ୍/ଏସ୍ଡିଏମ୍ ପୁରସ୍କାର ଗ୍ରହଣ କରିଥିଲେ। ପୁରସ୍କାର ବାବଦରେ ଜିଲ୍ଲାମାନଙ୍କୁ ସାର୍ଟିଫିକେଟ ଓ ଟ୍ରଫି ପ୍ରଦାନ କରାଯାଇଥିଲା। ସେହିଭଳି ରାଷ୍ଟ୍ରପତି ଦେଶର ୯ ଜଣ ବିଭାଗୀୟ ସଚିବଙ୍କୁ ମଧ୍ୟ ସମ୍ମାନିତ କରିଛନ୍ତି। ସେମାନଙ୍କ ମଧ୍ୟରେ ଓଡ଼ିଶାର ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ସଚିବ ସତ୍ୟବ୍ରତ ସାହୁ ଅଛନ୍ତି। ଏ ଅବସରରେ ରାଷ୍ଟ୍ରପତି କହିଥିଲେ ଜମିଜମା ରେକର୍ଡସ୍ର ପ୍ରଭାବୀ ଢଙ୍ଗରେ ଆଧୁନିକୀକରଣ କରାଯିବା ଗ୍ରାମୀଣ ବିକାଶର ମୌଳିକ ଆବଶ୍ୟକତା। ଦେଶର ସାମଗ୍ରିକ ବିକାଶ ପାଇଁ ଗ୍ରାମୀଣ ବିକାଶକୁ ଗତି ପ୍ରଦାନ କରିବା ଅନିବାର୍ଯ୍ୟ। ବ୍ୟାପକ ଏକୀକୃତ ଭୂମି ପରିଚାଳନା ପ୍ରଣାଳୀ ଗ୍ରାମୀଣ କ୍ଷେତ୍ରର ସମଗ୍ର ବିକାଶ ପାଇଁ ଅତ୍ୟନ୍ତ ମହତ୍ବପୂର୍ଣ୍ଣ ବୋଲି ରାଷ୍ଟ୍ରପତି କହିଛନ୍ତି।
