ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବିଜେପି ନେତୃତ୍ୱାଧୀନ ଏନଡିଏ ୨୦୨୪ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ରଣନୀତି ପ୍ରସ୍ତୁତ କରିବାରେ ଲାଗିପଡ଼ିଛି | ଅନ୍ୟପକ୍ଷରେ, କଂଗ୍ରେସ ସହିତ ୨୬ ବିରୋଧୀ ଦଳ ଇଣ୍ଡିଆନ ନ୍ୟାସନାଲ ଡେଭଲପମେଣ୍ଟ ଇନକ୍ଲୁସିଭ୍ ଆଲାଏନ୍ସ ଯଥା ଇଣ୍ଡିଆ(INDIA) ଗଠନ ନେଇ ଘୋଷଣା କରିସାରିଛନ୍ତି | ଏସବୁ ମଧ୍ୟରେ ୨୦୧୯ ଏବଂ ୨୦୧୪ ଲୋକସଭା ନିର୍ବାଚନର ଏକ ରୋଚକ ତଥ୍ୟ ଆଜି ଆମେ ଆପଣଙ୍କୁ ଜଣାଇବୁ | ବିରୋଧୀ ଦଳର ମିଳିତ ମଞ୍ଚ INDIA ପାଇଁ ଏହି ଆକଳନ ଏକ ବଡ଼ ଆହ୍ୱାନ ବୋଲି କୁହାଯାଇପାରେ। ଏହି ତଥ୍ୟରୁ ବିଜେପିର ଶକ୍ତି ଆକଳନ କରାଯାଇପାରିବ। ଦି ପ୍ରିଣ୍ଟରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ୨୦୧୯ ଲୋକସଭା ନିର୍ବାଚନରେ ବିଜେପି ତିନି ଲକ୍ଷରୁ ଅଧିକ ଭୋଟ ବ୍ୟବଧାନରେ ୧୦୫ଟି ସିଟ୍ ଜିତିଥିଲା । ୨୦୧୪ ସାଧାରଣ ନିର୍ବାଚନରେ ସମାନ ଭୋଟରେ ଜିତିଥିବା ଆସନ ଅପେକ୍ଷା ବିଜେପିର ଏହି ବିଜୟ ୬୩ ଆସନ ଅଧିକ ଥିଲା।
୨୦୧୯ ଲୋକସଭା ନିର୍ବାଚନରେ, ୨୩୬ ସାଂସଦଙ୍କ ମଧ୍ୟରୁ ଯେଉଁମାନେ ଦୁଇ ଲକ୍ଷ ଭୋଟରୁ ଅଧିକ ବ୍ୟବଧାନରେ ଜିତିଥିଲେ, ସେଥିମଧ୍ୟରୁ ୧୬୪ ଜଣ କେବଳ ବିଜେପିର ଥିଲେ। ଏଥି ସହିତ, ତିନି ଲକ୍ଷ ଭୋଟ୍ ବ୍ୟବଧାନରେ ଜିତିଥିବା ୧୩୧ ସାଂସଦଙ୍କ ମଧ୍ୟରୁ ୧୦୫ ଜଣ ବିଜେପିର ଥିଲେ। ଅବଶିଷ୍ଟ ୨୬ ସାଂସଦଙ୍କ ମଧ୍ୟରୁ ୧୦ ଜଣ ଡିଏମକେ ଏବଂ ୫ ଜଣ କଂଗ୍ରେସର ଥିଲେ। ବିଜେପି ପ୍ରାର୍ଥୀମାନେ ୪ ଲକ୍ଷରୁ ଅଧିକ ଭୋଟ ବ୍ୟବଧାନରେ ୪୪ ଟି ଆସନ ଜିତିଥିଲେ। କେବଳ ଏତିକି ନୁହେଁ, ଦଳର ୧୫ ଜଣ ଏମିତି ସାଂସଦ ଥିଲେ, ଯେଉଁମାନେ ୫ ଲକ୍ଷରୁ ଅଧିକ ଭୋଟରେ ଜିତିଥିଲେ। ଗଣତନ୍ତ୍ରରେ ବିଜୟ କିମ୍ବା ପରାଜୟର ଆକଳନ ଯଦିଓ କରିହେବ ନାହିଁ, କିନ୍ତୁ ଏହି ପରିସଂଖ୍ୟାନକୁ ଦେଖିଲେ ଏହା ସହଜରେ କୁହାଯାଇପାରେ ଯେ ବିରୋଧୀ ମେଣ୍ଟ ‘ଇଣ୍ଡିଆ’ ପାଇଁ ଏହି ଆସନରେ ବିଜେପିକୁ ଟକ୍କର ଦେବା ସହଜ ହେବ ନାହିଁ। ଏହି ଆକଳନକୁ ଭିତ୍ତି କରି ଏହି ୧୦୫ ଲୋକସଭା ଆସନରେ ବିଜେପିକୁ ପରାସ୍ତ କରିବା ଅସମ୍ଭବ ହୋଇପାରେ ବୋଲି କହିବା ଭୁଲ ହେବ ନାହିଁ।
