ଲଣ୍ଡନ, ୨୪/୦୧: ଦେଶରେ ବଢ଼ୁଥିବା କୋଭିଡ୍ ଆକ୍ରାନ୍ତ ସଂଖ୍ୟାକୁ ଦୃଷ୍ଟିରେ ରଖି ବ୍ରିଟିଶ୍ ସରକାର ଲକଡାଉନ୍ ଅବଧିକୁ ଜୁଲାଇ ୧୭, ୨୦୨୧କୁ ବଢାଇଛନ୍ତି । ଏଥି ସହିତ ବିପଦପୂର୍ଣ୍ଣ ଦେଶରୁ ଆସୁଥିବା ଲୋକଙ୍କ କ୍ୱାରେଣ୍ଟାଇନ୍ ଅବଧିକୁ ୧୦ ଦିନ ପର୍ଯ୍ୟନ୍ତ ବୃଦ୍ଧି କରାଯାଇଛି । ଦିନକୁ ଦିନ ୟୁନାଇଟେଡ୍ କିଙ୍ଗଡମ୍ ରେ କୋଭିଡ୍-୧୯ରେ ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଏପରି ନିଷ୍ପତ୍ତି ନିଆଯାଇଥିବା ସରକାରଙ୍କ ପକ୍ଷରୁ କୁହାଯାଇଛି ।
ଶନିବାର ଏକ ଖବରକାଗଜରେ ପ୍ରକାଶ ପାଇଥିବା ରିପୋର୍ଟ ଅନୁସାରେ, ବ୍ରିଟିଶ୍ ସରକାର ଲକଡାଉନ୍ ଆଇନ୍ରେ ସାମାନ୍ୟ ପରିବର୍ତ୍ତନ କରିଛନ୍ତି । ଏନେଇ କାଉନ୍ସିଲ୍କୁ ପପ୍, ରେଷ୍ଟୁରାଣ୍ଟ, ଦୋକାନ-ବଜାର, ଏବଂ ପବ୍ଲିକ୍ ସ୍ଥାନଗୁଡ଼ିକୁ ଜୁଲାଇ ୧୭ ତାରିଖ ପର୍ଯ୍ୟନ୍ତ ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
ୟୁକେର ପ୍ରଧାନମନ୍ତ୍ରୀ ବୋରିସ୍ ଜନସନ୍ ଗତ ଶୁକ୍ରବାର ଏନେଇ କହିଥିଲେ ଯେ, ଦେଶରେ ଲକଡାଉନ୍ ନିୟମରେ କୋହଳ କରାଯିବ ନାହିଁ । କାରଣ ଏବେ କୋଭିଡ୍ ଆକ୍ରାନ୍ତଙ୍କ ସଂଖ୍ୟା କ୍ଷୀପ୍ର ଗତିରେ ବୃଦ୍ଧି ପାଇବାରେ ଲାଗିଛି ଏବଂ ଦେଶରେ ଭ୍ୟାକ୍ସିନେସନ୍ ଚାଲୁ ରହିଛି । ନୂଆ ବ୍ରିଟେନ୍ ଭାଇରସ୍ ଦେଶରେ ମୃତ୍ୟୁ ସଂଖ୍ୟା ୧ ଲକ୍ଷ ପହାଞ୍ଚାଇବ ବୋଲି ଅନୁମାନ କରାଯାଉଛି ।
ଯାହାକି ଶନିବାର ୯୭ ହଜାର ୩ ଶହ ୨୯ରେ ପହଞ୍ଚିଛି । ବର୍ତ୍ତମାନ ୩୮ ହଜାରରୁ ଅଧିକ ଲୋକ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । କରୋନା ଭାଇରସ୍ର ପ୍ରଥମ ୱେଭ୍ ଠାରୁ ଅଧିକ ୭୮ ପ୍ରତିଶତ ଲୋକ ଏବେ ଆକ୍ରାନ୍ତ ହୋଇଛନ୍ତି ଏବଂ ୨୪ ଘଣ୍ଟା ମଧ୍ୟରେ ୪ ହଜାର ୬ ଶହରୁ ଅଧିକ ଲୋକ ଡାକ୍ତରଖାନାରେ ଭର୍ତ୍ତି ହୋଇଥିବା ବୋରିସ୍ କହିଛନ୍ତି ।
