ନୂଆଦିଲ୍ଲୀ, ୨୫|୦୮: ଅଗଷ୍ଟ ୨୭ ତାରିଖରୁ ଆରମ୍ଭ ହେବାକୁ ଯାଉଛି ଏସିଆ କପ୍ । ଏହାର ପରଦିନ ଅର୍ଥାତ ୨୮ ତାରିଖରେ ଭାରତ ଓ ପାକିସ୍ତାନ ପରସ୍ପରକୁ ଭେଟିବେ । ଯେଉଁ ମ୍ୟାଚ୍ ପାଇଁ ଫ୍ୟାନ୍ ଖୁବ୍ ଉତ୍ସାହିତ ଅଛନ୍ତି । ତେବେ ଏହି ମ୍ୟାଚ୍ ପୂର୍ବରୁ ଭାରତୀୟ ଦଳର ଷ୍ଟାର୍ ବ୍ୟାଟର ବିରାଟ କୋହଲି ଓ ପାକ୍ ଅଧିନାୟକ ବାବର ଆଜମ ଭେଟିଛନ୍ତି । ଟ୍ରେନିଂ ସେସନ୍ ବେଳେ ଉଭୟ ପରସ୍ପର ସହ ଆଲୋଚନା କରିଥିଲେ ।
ସୂଚନାନୁସାରେ, ଚଳିତବର୍ଷ ଶ୍ରୀଲଙ୍କା ଏସିଆ କପର ଆୟୋଜନ କରୁଛି । ସବୁ ମ୍ୟାଚ୍ ୟୁଏଇରେ ଖେଳାଯିବ । ସମସ୍ତ ଟିମ୍ ୟୁଏଇରେ ପହଁଚିଛନ୍ତି । ଭାରତ, ପାକିସ୍ତାନ, ଆଫଗାନିସ୍ତାନ ସମେତ ସବୁ ଟିମ୍ ଏବେ ଟ୍ରେନିଂରେ ବ୍ୟସ୍ତ ଅଛନ୍ତି । ଟ୍ରେନିଂ ବେଳେ ଭାରତୀୟ ଖେଳାଳି ପ୍ରଥମେ ଆଫଗାନିସ୍ତାନ ଖେଳାଳିଙ୍କୁ ଭେଟିଥିଲେ । ୟୁଜବେନ୍ଦ୍ର ଚହଲ, ହାର୍ଦ୍ଦିକ ପାଣ୍ଡ୍ୟା ଓ କୋହଲି ସମେତ ବାକି ଖେଳାଳି ଏଥିରେ ସାମିଲ ଥିଲେ ।
ଏହି ପରିପ୍ରେକ୍ଷୀରେ ବିରାଟ କୋହଲି ରଶିଦ ଖାନ୍ ଓ ବାବରଙ୍କୁ ଭେଟିଥିଲେ । ସେମାନଙ୍କ ହାଲଚାଲ ପଚାରି ବୁଝିଥିଲେ । ପରେ ଟ୍ରେନିଂ ପାଇଁ ଚାଲିଯାଇଥିଲେ । ଯାହା କ୍ୟାମେରାରେ କଏଦ ହୋଇଥିଲା । ଯାହାକୁ ବିସିସିଆଇ ନିଜେ ସେୟାର କରିଥିଲା । ଏହାସହ କ୍ୟାପ୍ସନରେ ଲେଖିଥିଲା ଯେ- କାନ୍ଧ ମିଳାଇଲେ, ହସିଲେ ଓ୍ୱାର୍ମ ଅଫ୍ ସହ ଏସିଆ କପ୍ ପାଇଁ ମଧ୍ୟ ପ୍ରସ୍ତୁତ ହେଲେ ।
ଏହି ଫଟୋ ପରେ ନେଟିଜେନ୍ସ ଭିନ୍ନ ପ୍ରତିକ୍ରିୟା ଦେଇଛନ୍ତି । କିଛି ୟୁଜର କହିଛନ୍ତି ଯେ, କୋହଲିଙ୍କୁ ଭେଟିବା ପରେ ବାବର କୋମାକୁ ଚାଲିଯାଇଥିବେ । ଆଉ କେହି ଦୁଇ ମହାନ ପ୍ଲେୟାର ପରସ୍ପରକୁ ଭେଟିଛନ୍ତି ବୋଲି କହିଛନ୍ତି ।
