ନୂଆଦିଲ୍ଲୀ: ଇସ୍ରାଏଲ ଉପରେ ଇରାନ ଅଭୂତପୂର୍ବ ଡ୍ରୋନ୍ ଓ କ୍ଷେପଣାସ୍ତ୍ର ଆକ୍ରମଣ କରିଛି। ଏହାର ପ୍ରତିଶୋଧ ନେବା ପାଇଁ ଇସ୍ରାଏଲ ଉପଯୁକ୍ତ ସମୟ ଓ ପଦ୍ଧତି ବାଛିବ। ଇରାନକୁ ଏହାର ଉପଯୁକ୍ତ ମୂଲ୍ୟ ଦେବାକୁ ପଡ଼ିବ। ଇସ୍ରାଏଲ ମନ୍ତ୍ରୀ ବେନି ଗାଣ୍ଟଜ୍ ଗତକାଲି ରାତିରେ ଏହା କହିଛନ୍ତି। ଏହାର ଜବାବରେ ଜାତିସଂଘରେ ଇରାନର ରାଷ୍ଟ୍ରଦୂତ କହିଛନ୍ତି ଯେ ଦମାସ୍କସରେ ଥିବା ଏହାର ଦୂତାବାସ ଉପରେ ଇସ୍ରାଏଲ ଆକ୍ରମଣର ଜବାବରେ ଆତ୍ମରକ୍ଷା ପାଇଁ ଇରାନ ନିଜର ଅଧିକାରକୁ ସାବ୍ୟସ୍ତ କରିଛି। ଏ ମାମଲାକୁ ଏଇଠି ଶେଷ ହେବାକୁ ଦିଆଯାଉ। ଯଦି ଇସ୍ରାଏଲ ସରକାର ଇରାନ ଉପରେ ପ୍ରତିଶୋଧ ନେବାକୁ ଯାଇ ଆଉ ଏକ ଭୁଲ କରନ୍ତି ଇରାନର ଜବାବ ଭୟଙ୍କର ହେବ।
ଏହି ମାମଲାରେ ଭାରତ ଓ ଆମେରିକା ଇସ୍ରାଏଲକୁ ସଂଯମ ରଖିବା ପାଇଁ ପରାମର୍ଶ ଦେଇଛନ୍ତି। ଜାତିସଂଘରେ ନିଯୁକ୍ତ ଇସ୍ରାଏଲର ପ୍ରତିନିଧି ଗିଲାଡ୍ ଏର୍ଡାନ୍ ସୁରକ୍ଷା ପରିଷଦକୁ ଇରାନ ଉପରେ ସମସ୍ତ ପ୍ରକାର ପ୍ରତିବନ୍ଧକ ଲଗାଇବାକୁ ଆହ୍ୱାନ ଦେଇଛନ୍ତି। ଏହାବ୍ୟତୀତ ଜି-୭ ନେତାମାନେ ପୂର୍ବରୁ କହିଥିଲେ ଯେ ଅସ୍ଥିରତା ସୃଷ୍ଟିକାରୀ ପଦକ୍ଷେପର ଜବାବରେ ସେମାନେ ପରବର୍ତ୍ତୀ ପଦକ୍ଷେପ ନେବାକୁ ପ୍ରସ୍ତୁତ ଅଛନ୍ତି। ଆମେରିକାର ଜଣେ ଉଚ୍ଚପଦସ୍ଥ ଅଧିକାରୀ କହିଛନ୍ତି, ରାଷ୍ଟ୍ରପତି ଜୋ ବାଇଡେନ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ କହିଛନ୍ତି ଯେ, ଇରାନ ବିରୋଧରେ କୌଣସି ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ପାଇଁ ୱାସିଂଟନ ସାମରିକ ସମର୍ଥନ ପ୍ରଦାନ କରିବ ନାହିଁ। ବାଇଡେନ୍ ରବିବାର କହିଛନ୍ତି ଯେ ଇରାନ ଦ୍ୱାରା ପ୍ରକ୍ଷେପଣ କରାଯାଇଥିବା ଅଧିକାଂଶ ଡ୍ରୋନ୍ ଓ କ୍ଷେପଣାସ୍ତ୍ରକୁ ରୋକିବାରେ ଆମେରିକୀୟ ସେନା ଇସ୍ରାଏଲକୁ ସାହାଯ୍ୟ କରିଥିଲା। ଏହାବ୍ୟତୀତ ବାଇଡେନ ଜି-୭ର ଅନ୍ୟ ନେତାମାନଙ୍କ ସହ ଆଲୋଚନା କରି ତେହେରାନର କାର୍ଯ୍ୟକଳାପ ଉପରେ କୂଟନୈତିକ ରଣନୀତି ପ୍ରସ୍ତୁତ ପାଇଁ ଇଚ୍ଛା ପ୍ରକାଶ କରିଛନ୍ତି। ଇସ୍ରାଏଲ୍ ସେନା ଘୋଷଣା କରିଛି ଯେ ଆମେରିକା, ବ୍ରିଟେନ୍, ଫ୍ରାନ୍ସ ଏବଂ ଅନ୍ୟ ସହଯୋଗୀ ରାଷ୍ଟ୍ରମାନଙ୍କ ସହ ମିଶି ଇସ୍ରାଏଲ ପ୍ରଥମ ଥର ପାଇଁ ଇରାନର ଅଭୂତପୂର୍ବ ଆକ୍ରମଣର ଜବାବ ଦେବା ପାଇଁ ଏକ ‘ମେଣ୍ଟ’ ଗଠନ କରିଛି। ଆମେ ସମସ୍ତେ ମିଶି ଇରାନର ଆକ୍ରମଣକୁ ବିଫଳ କରିଥିଲୁ। ପ୍ରଥମ ଥର ପାଇଁ ଏଭଳି ମେଣ୍ଟ ମଧ୍ୟପ୍ରାଚ୍ୟରେ ଇରାନ ଓ ତା’ର ପ୍ରକ୍ସିଙ୍କ ବିପଦ ବିରୋଧରେ ଏକାଠି କାମ କରିଛି ବୋଲି ଆଇଡିଏଫ୍ ମୁଖପାତ୍ର ରିଅର୍ ଆଡମିରାଲ ଡାନିଏଲ୍ ହାଗରି କହିଛନ୍ତି।
ଭାରତ କହିଛି ଯେ ଏହି ଅଞ୍ଚଳରେ ବୃଦ୍ଧି ପାଉଥିବା ଉତ୍ତେଜନାକୁ ଆଲୋଚନା ଓ କୂଟନୀତି ମାଧ୍ୟମରେ ସମାଧାନ କରାଯିବା ଉଚିତ। ଆମେ ତୁରନ୍ତ ଉତ୍ତେଜନା ହ୍ରାସ, ସଂଯମ ଅବଲମ୍ବନ, ହିଂସାରୁ ଓହରି କୂଟନୀତି ମାର୍ଗକୁ ଫେରିବାକୁ ଆହ୍ୱାନ କରୁଛୁ। ଏହି ଅଞ୍ଚଳରେ ନିରାପତ୍ତା ବଜାୟ ରଖିବା ଜରୁରୀ ବୋଲି ବୈଦେଶିକ ମନ୍ତ୍ରାଳୟ କହିଛି। ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ତାଙ୍କ ଇସ୍ରାଏଲ ପ୍ରତିପକ୍ଷଙ୍କ ସହ ଟେଲିଫୋନ୍ ଯୋଗେ ଆଲୋଚନା କରି ଭାରତର ଉଦ୍ବେଗ ଜଣାଇଛନ୍ତି। ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ ଗତକାଲି ନିରାପତ୍ତା ପରିଷଦ ସମ୍ମୁଖରେ ଅନ୍ତର୍ଜାତୀୟ ସମୁଦାୟକୁ ସଂଘର୍ଷକୁ ଆହୁରି ବୃଦ୍ଧି ନ କରିବାକୁ ଅନୁରୋଧ କରିଛନ୍ତି। ଗୁଟେରେସ୍ କହିଛନ୍ତି ଯେ ଏହି ଅଞ୍ଚଳ କିମ୍ବା ବିଶ୍ୱ ଅଧିକ ଯୁଦ୍ଧଭାର ବହନ କରିପାରିବ ନାହିଁ।
