ନୂଆଦିଲ୍ଲୀ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାନଙ୍କ ହେଲିକପ୍ଟରରେ ଯାନ୍ତ୍ରିକ ତ୍ରୁଟି ପରେ ରାୱଲପିଣ୍ଡିରେ ଏହାର ଜରୁରୀ ଅବତରଣ କରାଯାଇଛି । ଇମରାନ ଖାନଙ୍କ ତହରିକ-ଏ-ଇନସାଫ ଟ୍ୱିଟ୍ କରି ଏହି ସୂଚନା ଦେଇଛି । ଏଥିରେ କୁହାଯାଇଛି, ପଖତୁନଖୱା ପ୍ରାନ୍ତରେ ଡେରା ଇସ୍ମାଇଲ ଖାନଠୁ ବାନୀଗାଲା ଯିବା ସମୟରେ ହେଲିକପ୍ଟରରେ ଯାନ୍ତ୍ରିକ ତ୍ରୁଟି ଦେଖା ଦେଇଥିଲା । ଏହାପରେ ରାୱଲପିଣ୍ଡିର ଅଦିୟାଲା ଗାଁରେ ଜରୁରୀ ଅବତରଣ କରାଯାଇଥିଲା ।
ବୟାନରେ କୁହାଯାଇଛି ଯେ, ପରେ ଇମରାନ ଖାନ ସଡକ ମାର୍ଗ ଦେଇ ଇସଲମାବାଦ ସ୍ଥିତ ନିଜ ବାସଭବନରେ ପହଞ୍ଚିଥିଲେ । ଉଲ୍ଲେଖଯୋଗ୍ୟ, ବନ୍ୟା ପୀଡିତକୁ ରିଲିଫ୍ ବାଣ୍ଟିବା ପାଇଁ ଡେରା ଇସ୍ମାଇଲ ଖାନ ଜିଲ୍ଲା ଗସ୍ତ କରିଥିଲେ ଇମରାନ ଖାନ।
ଉଲ୍ଲେଖଯୋଗ୍ୟ ଯେ, ଏହି ଘଟଣାର ଗୋଟିଏ ଦିନ ପୂର୍ବେ ଇମାନର ଖାନ ଅଭିଯୋଗ ଆଣି ତାଙ୍କୁ ହତ୍ୟା କରିବାକୁ ଷଡଯନ୍ତ୍ର କରାଯାଇଥିବା କହିଥିଲେ । ଏହାସହ ଚେତାବନୀ ଦେଇଥିଲେ ଯେ, ଯଦି ତାଙ୍କ ସହ କିଛି ଅଘଟଣ ଘଟେ ତେବେ ଏହି ଷଡଯନ୍ତ୍ରକାରୀଙ୍କ ନାଁ ଦେଶ ଆଗରେ ଉଜାଗର କରାଯିବ ।
