ନୂଆଦିଲ୍ଲୀ, ୧୬|୦୮: ଇନୋଭା ଉପରେ ଓଲଟି ଗଲା ଟ୍ରକ୍ । ଜଣେ ଯୁବତୀ ଓ ୩ ଯୁବକଙ୍କ ମୃତ୍ୟୁ । ଏପରି ହୃଦୟ ବିଦାରକ ଦୁର୍ଘଟଣା ଘଟିଛି ଗୁରଗାଓଁରେ । ଏହାସହ ଦୁଇ ଜଣ ଗୁରୁତର ହୋଇଛନ୍ତି । ଗୁରୁତରଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ଇନୋଭା ଉପରେ ଏକ ଟ୍ରକ୍ ଓଲଟି ପଡିବାରୁ ଏପରି ଅଘଟଣ ଘଟିଛି ।
ସୂଚନାନୁସାରେ, ଗୁରଗାଓଁର ବିଳାସପୁର ଥାନା ଅଞ୍ଚଳରେ ଏହି ଦୁର୍ଘଟଣା ଘଟିଛି । ସୋମବାର ବିଳମ୍ବିତ ରାତି ପ୍ରାୟ ୧ଟା ୪୦ରେ ପୋଲିସକୁ ଦୁର୍ଘଟଣା ବାବଦରେ ସୂଚନା ମିଳିଥିଲା । ବିଳାସପୁରରେ ଏକ ଟ୍ରକ୍ ଇନୋଭା ଉପରେ ଓଲଟି ପଡିଥିବା ରିପୋର୍ଟ ମିଳିବା ପରେ ତୁରନ୍ତ ପୋଲିସ ପହଁଚିଥିଲା । ଘଟଣାସ୍ଥଳରେ ପହଁଚିବା ପରେ କାରଟି ସମ୍ପୂର୍ଣ୍ଣ ଭାବେ ଟ୍ରକ୍ ତଳେ ଚାପି ହୋଇ ରହିଥିବା ଜେଖିବାକୁ ମିଳିଥିଲା ।
ପୋଲିସ ତୁରନ୍ତ କାରରେ ଫସିଥିବା ଯାତ୍ରୀଙ୍କୁ ଉଦ୍ଧାର କରିଥିଲା । ସେତେବେଳକୁ ଜଣେ ଯୁବତୀ ଓ ତିନି ଯୁବକଙ୍କ ମୃତ୍ୟୁ ହୋଇ ସାରିଥିଲା । ତେବେ ଏଥିରେ ଜଣେ ଯୁବକ ଓ ଅନ୍ୟ ଜଣେ ଯୁବତୀ ଗୁରୁତର ହୋଇଛନ୍ତି । ସେମାନଙ୍କୁ ନିକଟସ୍ଥ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ମୃତଦେହକୁ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇଛି ପୋଲିସ ।
ପୋଲିସ ଅଧିକାରୀଙ୍କ କହିବାନୁସାରେ, ଇନୋଭାରେ ଥିବା ଯୁବକ-ଯୁବତୀ ଉଦୟପୁର ବୁଲି ଫେରୁଥିଲେ । ସେମାନେ ଅଗଷ୍ଟ ୧୫ ଛୁଟି ଥିବାରୁ ବୁଲି ଫେରୁଥିଲେ । ଫେରିବା ବେଳେ ହିଁ ଭୟଙ୍କର ଦୁର୍ଘଟଣା ଘଟିଥିଲା । ପୋଲିସ ସମସ୍ତ ମୃତାହତଙ୍କ ପରିବାର ଲୋକଙ୍କୁ ଦୁର୍ଘଟଣା ବାବଦରେ ସୂଚନା ଦେଇଛି ।
