ନୂଆଦିଲ୍ଲୀ ୨୦।୦୯: ରେକର୍ଡ ବ୍ରେକର ଆର ଅଶ୍ୱିନ । ବାଂଲାଦେଶ ବିପକ୍ଷ ଟେଷ୍ଟ ମ୍ୟାଚ୍ରେ ଖୁବ ଚର୍ଚ୍ଚାରେ । ପ୍ରଥମ ମ୍ୟାଚ୍ରେ ହିଁ କରିଛନ୍ତି ୱାର୍ଲଡ ରେକର୍ଡ । ସେ ମ୍ୟାଚ୍ର ପ୍ରଥମ ଦିନରେ ନିଜ ଟେଷ୍ଟ କ୍ୟାରିୟରର ଷଷ୍ଠ ଶତକ ଲଗାଇଛନ୍ତି ।
ଏହାବ୍ୟତୀତ ସେ ବର୍ତ୍ତମାନ ଯାଏଁ ଅପରାଜିତ ରହିଛନ୍ତି । ଅଶ୍ବିନୀ ବର୍ତ୍ତମାନ ରଚିଛନ୍ତି ନୂଆ ଇତିହାସ । ଯାହାକୁ ୧୪୭ ବର୍ଷରେ କେହି କରିପାରିନଥିଲେ ସେ କରି ଦେଖାଇଛନ୍ତି । ବାସ୍ତବରେ ଅଶ୍ବିନୀ ବ୍ୟାଟିଂରେ ନୁହେଁ ବରଂ ଅଲରାଉଣ୍ଡର ଭାବରେ କରିଛନ୍ତି ବିଶ୍ୱ ରେକର୍ଡ । ଅଶ୍ବିନୀ ନିଜ କ୍ୟାରିୟରରେ ୬ ଶତକ ବ୍ୟତୀତ ଲଗାଇ ସାରିଛନ୍ତି ୧୬ଟି ଅର୍ଦ୍ଧଶତକ ।
ଆର ଅଶ୍ୱିନ ଟେଷ୍ଟ କ୍ରିକେଟରେ ବ୍ୟାଟ୍ସମ୍ୟାନ୍ ଭାବରେ ୨୦ ଥରରେ ୫୦ରୁ ଅଧିକ ରନ ସ୍କୋର ଏବଂ ବୋଲିଂରେ ୩୦ରୁ ଅଧିକ ଥର ୫ଟି ଲେଖାଏଁ ଓ୍ବିକେଟ ନେଇଥିବା ପ୍ରଥମ କ୍ରିକେଟର ହେଇଛନ୍ତି । ତେବେ ୧୪୭ ବର୍ଷର ଟେଷ୍ଟ କ୍ରିକେଟ୍ ଇତିହାସରେ ଏପରି ପୂର୍ବରୁ ହୋଇନଥିଲା । ତେଣୁ ଅଶ୍ୱିନ ଏପରି କରିବାରେ ହୋଇଛନ୍ତି ଦୁନିଆର ପ୍ରଥମ କ୍ରିକେଟର ।
ବାଂଲାଦେଶ ବିପକ୍ଷ ମ୍ୟାଚ୍ ଅଶ୍ୱିନଙ୍କ ଟେଷ୍ଟ କ୍ୟାରିୟରର ୧୦୧ତମ ମ୍ୟାଚ । ସେ ବ୍ୟାଟିଂରେ ୩୪୦୦ରୁ ଅଧିକ ରନ୍ ସଂଗ୍ରହ କରିଛନ୍ତି । ଏହି ସମୟରେ ସେ ୬ଟି ଶତକ ଲଗାଇବା ସହିତ ୧୪ଟି ଅର୍ଦ୍ଧଶତକ ହାସଲ କରିଛନ୍ତି । ଟେଷ୍ଟ ମ୍ୟାଚ୍ରେ ବୋଲିଂରେ ସେ ୩୬ରୁ ଅଧିକ ଥର ଗୋଟିଏ ଇନିଂସରେ ୫ କିମ୍ବା ତାଠାରୁ ଅଧିକ ୱିକେଟ୍ ନେଇଛନ୍ତି ।
ଅଶ୍ବିନଙ୍କ ରେକର୍ଡ ଏଥିପାଇଁ ଖାସ୍ କାରଣ ଅଷ୍ଟମ କିମ୍ବା ତା’ଠାରୁ ତଳ ଅର୍ଡରରେ ବ୍ୟାଟିଂ କରିବାକୁ ଆସି ସେ ୪ଟି ଶତକ ଲଗାଇଛନ୍ତି । ବର୍ତ୍ତମାନ ଯାଏଁ ଅଷ୍ଟମ କିମ୍ବା ତା’ଠାରୁ କମ୍ ଓ୍ବିକେଟରେ ବ୍ୟାଟିଂ କରିବାକୁ ଆସି ଶତକ ଲଗାଇବାର ରେକର୍ଡ ନ୍ୟୁଜିଲ୍ୟାଣ୍ଡର ପୂର୍ବତନ ଅଧିନାୟକ ଡାନିଏଲ୍ ଭିଟ୍ଟୋରିଙ୍କ ନାଁରେ ରହିଛି । ଏହି ଅର୍ଡରରେ ବ୍ୟାଟିଂ କରୁଥିବା ବେଳେ ସେ ୫ଟି ଶତକ ଲଗାଇଥିଲେ ।
ରବିଚନ୍ଦ୍ରନ ଅଶ୍ୱିନ ତାମିଲନାଡୁରୁ ଆସିଛନ୍ତି । ତାଙ୍କର ଘରୋଇ ଗ୍ରାଉଣ୍ଡରେ ବ୍ୟାଟିଂ ରେକର୍ଡ ମଧ୍ୟ ବହୁତ ଭଲ । ବର୍ତ୍ତମାନ ପର୍ଯ୍ୟନ୍ତ ସେ ଚେନ୍ନାଇର ଏମ ଚିଦାମ୍ବରମ ଷ୍ଟାଡିୟମରେ ୫ଟି ଟେଷ୍ଟ ମ୍ୟାଚର ୭ଟି ଇନିଂସରେ ୩୩୧ ରନ୍ ସଂଗ୍ରହ କରିଛନ୍ତି । ଯେଉଁଥିରେ ତାଙ୍କର ଷ୍ଟ୍ରାଇକ୍ ରେଟ୍ ୫୫ରୁ ଅଧିକ ରହିଛି । ଅନ୍ୟପକ୍ଷରେ ଯଦି ବୋଲିଂକୁ ଦେଖିବା, ତେବେ ଚେନ୍ନାଇ ଷ୍ଟାଡିୟମରେ ଅଶ୍ୱିନ ଏପର୍ଯ୍ୟନ୍ତ ୩୦ରୁ ଅଧିକ ୱିକେଟ୍ ନେଇଛନ୍ତି।
