ୱାସିଂଟନ: ସୋମବାର ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସୁପ୍ରିମ୍କୋର୍ଟରୁ ଏକ ବଡ଼ ବିଜୟ ମିଳିଛି। ଜାନୁଆରି ୬, ୨୦୨୧ରେ ଆମେରିକା ସଂସଦ ଆକ୍ରମଣ ଘଟଣାରେ କଲରାଡୋର ମତଦାନରୁ ତାଙ୍କୁ ବଞ୍ଚିତ କରାଯାଇଥିଲା। ଆମେରିକାର ସର୍ବୋଚ୍ଚ ନ୍ୟାୟାଳୟ ସୋମବାର ଏହି ଆଦେଶକୁ ରଦ୍ଦ କରି ଟ୍ରମ୍ପଙ୍କ ଦ୍ବିତୀୟବାର ରାଷ୍ଟ୍ରପତି ହେବା ଆଶାକୁ ଉଜ୍ଜୀବିତ କରିଛନ୍ତି।
ଆମେରିକା ସମ୍ବିଧାନର ଚତୁର୍ଦ୍ଦଶ ସଂଶୋଧନ ଟ୍ରମ୍ପଙ୍କୁ ପୁନର୍ବାର ସରକାରୀ ପଦବିରେ ରହିବା ପାଇଁ ଅଯୋଗ୍ୟ ଘୋଷଣା କରିବା ପରେ କଲରାଡୋର ସର୍ବୋଚ୍ଚ ଅଦାଲତ ଗତ ଡିସେମ୍ବର ୧୯ ତାରିଖରେ ତାଙ୍କୁ ରାଜ୍ୟର ରିପବ୍ଲିକାନ୍ ପ୍ରାଥମିକ ମତଦାନରୁ ବହିଷ୍କାର କରିବାକୁ ଦେଇଥିବା ରାୟକୁ ବିଚାରପତିମାନେ ସର୍ବସମ୍ମତିକ୍ରମେ ଖାରଜ କରି ଦେଇଛନ୍ତି। ନଭେମ୍ବର ୫ରେ ହେବାକୁ ଥିବା ଆମେରିକା ନିର୍ବାଚନରେ ଡେମୋକ୍ରାଟିକ୍ ରାଷ୍ଟ୍ରପତି ଜୋ ବାଇଡେନଙ୍କୁ ଚ୍ୟାଲେଞ୍ଜ କରିବା ପାଇଁ ରିପବ୍ଲିକାନ୍ ପ୍ରାର୍ଥୀ ହେବା ଲାଗି ଦୌଡ଼ରେ ଟ୍ରମ୍ପ ସବୁଠାରୁ ଆଗରେ ଅଛନ୍ତି। ଦଳରେ ତାଙ୍କର ଏକମାତ୍ର ପ୍ରତିଦ୍ୱନ୍ଦ୍ୱୀ ହେଉଛନ୍ତି ପୂର୍ବତନ ଗଭର୍ଣ୍ଣର ନିକି ହାଲି। ଏହି ରାୟ ଆସିବା ପରେ ଟ୍ରମ୍ପ ସୋସିଆଲ ମିଡିଆ ପୋଷ୍ଟ୍ରେ କହିଛନ୍ତି ‘ଆମେରିକା ପାଇଁ ବଡ଼ ବିଜୟ !’
