ନୂଆଦିଲ୍ଲୀ ୦୯/୦୭: ସାଧାରଣ ଲୋକ ହୁଅନ୍ତୁ କିମ୍ବା ବି-ଟାଉନ୍ ସେଲିବ୍ରେଟ୍, ଆତ୍ମହତ୍ୟା ଘଟଣା ଦିନକୁ ଦିନ ବଢିବାରେ ଲାଗିଛି । ନିକଟରେ ଫିଲ୍ମ ଇଣ୍ଡଷ୍ଟ୍ରିରୁ ଏଭଳି ଏକ ଖବର ସାମ୍ନାକୁ ଆସିଛି । ଫିଲ୍ମ ‘ଦ କାଶ୍ମୀର ଫାଇଲ୍ସ’ର ପ୍ରଡ୍ୟୁସର ସରାହନା ଆତ୍ମହତ୍ୟା କରିଛନ୍ତି। ସରାହନା ଜୁନ୍ ୩୦ ରେ ତାଙ୍କ ଘରେ ଆତ୍ମହତ୍ୟା କରିଛନ୍ତି । ବଲିଉଡ ଅଭିନେତା ଅନୁପମ ଖେର ଏହି ଖବର ପାଇଲା ପରେ ଆଶ୍ଚର୍ଯ୍ୟ ହୋଇଯାଇଛନ୍ତି, କାରଣ ସରାହନାଙ୍କ ଆତ୍ମହତ୍ୟା ପୂର୍ବରୁ ତାଙ୍କ ସହ ସେ ବହୁ ସମୟ କଥା ହୋଇଥିଲେ।
ଏଥି ସହିତ ଅନୁପମ ଖେର ସରାହନାଙ୍କ ଫଟୋ, ଭିଡିଓ ଏବଂ ତାଙ୍କ ମୃତ୍ୟୁର ମେସେଜ୍ ସେୟାର କରି ଏକ ନୋଟ୍ ଲେଖିଛନ୍ତି । ଅଭିନେତା ଲେଖିଛନ୍ତି, ‘ଏ ହେଉଛନ୍ତି ସରାହନା । ଯେତେବେଳେ ମୁଁ ଦେହରାଡୁନ୍ ଏବଂ ମୁସୁରିରେ ଏହି ଫିଲ୍ମର ସୁଟିଂ କରୁଥିଲି ସେତେବେଳେ ସେ ‘କାଶ୍ମୀର ଫାଇଲ୍ସ’ର ପ୍ରଡ୍ୟୁସର ଥିଲେ। ଗତ ବର୍ଷ ଡିସେମ୍ବର ୨୨ ରେ ୟୁନିଟ୍ ତାଙ୍କ ଜନ୍ମଦିନ ପାଳନ କରିଥିଲା। ସୁଟିଂ ପରେ ଲକଡାଉନ୍ ଚାଲୁଥିବାରୁ ସେ ନିଜ ସହର ଆଲିଗଡକୁ ଯାଇଥିଲେ। ସେ ନିଜ କାର୍ଯ୍ୟରେ ଉଜ୍ଜ୍ୱଳ, ଦକ୍ଷ, ସାହାଯ୍ୟକାରୀ ଏବଂ ଉତ୍କୃଷ୍ଟ ଥିଲେ । ସେ ମୋତେ ମୋ ମା’ଙ୍କ ଜନ୍ମଦିନରେ ଶୁଭେଚ୍ଛା ଜଣାଇବାକୁ ମେସେଜ କରିଥିଲେ।’
ଅଭିନେତା ଆହୁରି ଲେଖିଛନ୍ତି, ‘ମୁଁ ଫୋନ କରି ତାଙ୍କ ସହ କଥା ହୋଇଥିଲି ଏବଂ ତାଙ୍କୁ ମା’ଙ୍କ ଆଶୀର୍ବାଦ ଦେଇଥିଲି । ସେ ସମ୍ପୂର୍ଣ୍ଣ ଭଲ ଦେଖାଯାଉଥିଲେ। ଆଜି ମୁଁ ଫୋନରେ କିଛି ପାଇଲି ଯାହା ପ୍ରକୃତରେ ମୋତେ ଥରାଇଦେଲା ଏବଂ ମୋତେ ବହୁତ ଦୁଃଖି କରିଦେଲା । ମୁଁ ସରାହନାଙ୍କ ମାଙ୍କ ସହିତ କଥା ହେଲି । ଉଦାସୀନତା ପ୍ରକୃତରେ ଯୁବ ପିଢିକୁ ବହୁତ ପ୍ରଭାବିତ କରୁଛି । ମୁଁ ତାଙ୍କ ଆତ୍ମାର ଶାନ୍ତି ପାଇଂ ପ୍ରାର୍ଥନା କରୁଛି ଏବଂ ଆଶା କରୁଛି ଯେ ତାଙ୍କ ମା ଏବଂ ଭାଇ ଏହି କ୍ଷତିର ମୁକାବିଲା କରିପାରିବେ । ଏହା ଅତ୍ୟନ୍ତ ଦୁଃଖ ଦାୟକ।’
ଫିଲ୍ମ ‘କାଶ୍ମୀର ଫାଇଲ୍ସ’ ଅଗଷ୍ଟ ୧୫, ୨୦୨୧ ରେ ରିଲିଜ୍ ହେବ । ଏହି ଫିଲ୍ମରେ ମିଥୁନ ଚକ୍ରବର୍ତ୍ତୀ ଏବଂ ଅନୁପମ ଖେର ଏକାଠି ନଜର ଆସିବେ। ଏହି ଫିଲ୍ମଟି ବିବେକ ଅଗ୍ନିହୋତ୍ରୀଙ୍କ ଦ୍ୱାରା ଲିଖିତ ଏବଂ ନିର୍ଦ୍ଦେଶିତ ।
