ନୂଆଦିଲ୍ଳୀ: ଜାମ୍ମୁ କାଶ୍ମୀରର ବିଭିନ୍ନ ସ୍ଥାନରେ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ପକ୍ଷରୁ ଚଢ଼ାଉ ହୋଇଛି। କିଛି ଅାତଙ୍କବାଦୀ ଗୋଷ୍ଠୀ ସେମାନଙ୍କ ପାକିସ୍ତାନୀ କମାଣ୍ଡର୍ଙ୍କ ନିର୍ଦ୍ଦେଶରେ ଦେଶରେ ଅପରାଧିକ ଷଡଯନ୍ତ୍ର ରଚୁଥିବା ସୂଚନା ପାଇବା ପରେ ଏନ୍ଆଇଏ ଏହି ଚଢ଼ାଉ ଆରମ୍ଭ କରିଛି। ତେବେ ଚଢ଼ାଉ ଶ୍ରୀନଗର, ଅନନ୍ତନାଗ, କୁପୱାରା, ପୁଞ୍ଚ, ରାଜୌରୀ ଏବଂ କିସ୍ତ୍ୱାର୍ ଆଦି ସ୍ଥାନରେ ହୋଇଛି।
ମେ ୫ ତାରିଖରେ ରାଜୌରୀ ଜିଲ୍ଲାର ଆତଙ୍କବାଦୀଙ୍କ ସହ ଗୁଳି ବିନିମୟରେ ପାଞ୍ଚ ଜଣ ସେନା ଯବାନ ସହିଦ ହେବା ପରେ ଏହି ଚଢ଼ାଉ ହୋଇଛି। ଏହା ପୂର୍ବରୁ ଏପ୍ରିଲ୍ ୨୦ ତାରିଖେରେ ପୁଞ୍ଚ ଜିଲ୍ଲାରେ ଆତଙ୍କବାଦୀ ଆକ୍ରମଣରେ ପାଞ୍ଚ ଜଣ ସେନା ଯବାନ ସହିଦ ହୋଇଥିଲେ। ଏନେଇ ପ୍ରତିରକ୍ଷା ଅଧିକାରୀ କହିଥିଲେ କି ସେନା ଗାଡ଼ିଟି ଭିମ୍ବେର୍ ଗାଲିରୁ ପୁଞ୍ଚ୍ର ସାଙ୍ଗିଓଟ୍କୁ ଯାଉଥିବା ବେଳେ ଆତଙ୍କବାଦୀମାନେ ଗାଡି ଉପରକୁ ଗୁଳି ଚଳାଇଥିଲେ। ସୂତ୍ରରୁ ପ୍ରକାଶ ଯେ ପୂର୍ବରୁ ରଜୌରୀ ଏବଂ ପୁଞ୍ଚ ସେକ୍ଟର ଚାରିପାଖରେ ଥିବା ପାକ୍ ଅଧିକୃତ କଶ୍ମୀରରେ ଆତଙ୍କବାଦୀ ଗତିବିଧି ଲକ୍ଷ କରାଯାଇଥିଲା।
