ନୂଆଦିଲ୍ଲୀ: କିଛି ଦିନର କଳ୍ପନାଜଳ୍ପନା ଏବଂ ଦ୍ବନ୍ଦ୍ବର ଅବସାନ ଘଟାଇ ଭାରତୀୟ ଓପ୍ନର ରୋହିତ ଶର୍ମା ଶେଷରେ ଅଷ୍ଟ୍ରେଲିଆ ଅଭିମୁଖେ ଯାତ୍ରା କରିଛନ୍ତି। ବେଙ୍ଗାଲୁରୁସ୍ଥିତ ଏନ୍ସିଏ (ଜାତୀୟ କ୍ରିକେଟ୍ ଏକାଡେମି)ରୁ ଫିଟ୍ନେସ୍ ପ୍ରମାଣପତ୍ର ପାଇସାରିଥିବା ରୋହିତ ମଙ୍ଗଳବାର ଭୋର୍ ସମୟରେ ସ୍ବଦେଶ ଛାଡ଼ିଥିଲା ବେଳେ ବୁଧବାର ସମ୍ଭବତଃ ଅଷ୍ଟ୍ରେଲିଆରେ ଥିବା ଭାରତୀୟ ଟେଷ୍ଟ୍ ଦଳ ସହ ଯୋଗଦେବେ। ଅଧିନାୟକ ବିରାଟ କୋହଲି ପ୍ରଥମ ଟେଷ୍ଟ୍ ଖେଳି ସ୍ବଦେଶ ଫେରିଆସିବାର ଥିଲା ବେଳେ ତୃତୀୟ ଟେଷ୍ଟ୍ ପୂର୍ବରୁ ରୋହିତ ପ୍ରସ୍ତୁତ ହୋଇଯାଇଥିବାର ଆଶା ରଖିଛନ୍ତି। ରୋହିତ ମଙ୍ଗଳବାର ଦୁବାଇ ବାଟ ଦେଇ ଅଷ୍ଟ୍ରେଲିଆ ଯାତ୍ରା କରିଥିଲା ବେଳେ ସେଠାରେ ଦୁଇ ସପ୍ତାହ ବାଧ୍ୟତାମୂଳକ ସଂଗରୋଧ ଅବଧି ମଧ୍ୟରେ ଫିଟ୍ନେସ୍ ନେଇ କାର୍ଯ୍ୟ କରିବେ। ଅଷ୍ଟ୍ରେଲିଆରେ ମଧ୍ୟ ରୋହିତଙ୍କ ସ୍ବାସ୍ଥ୍ୟବସ୍ଥାର ପୁନଃଆକଳନ କରାଯିବ ବୋଲି ପୂର୍ବରୁ ବିସିସିଆଇ କହିସାରିଛି। ଅଷ୍ଟ୍ରେଲିଆରେ ଥିବା ଟିମ୍ ଇଣ୍ଡିଆ ଚିକିତ୍ସକ ଦଳ ତାଙ୍କ ଫିଟ୍ନେସ୍ ପୁନଃଆକଳନ କରିବା ପରେ ସେ ବର୍ଡର-ଗାଭାସ୍କର ଟେଷ୍ଟ୍ ଶୃଙ୍ଖଳା ଖେଳିବା ନେଇ ନିଷ୍ପତ୍ତି ଶୁଣାଇବେ ବୋଲି ବିସିସିଆଇ କହିଛି। ତେବେ ତୃତୀୟ ଟେଷ୍ଟ ଆସନ୍ତାବର୍ଷ ଜାନୁଆରି ୭ ତାରିଖରୁ ଆରମ୍ଭ ହେବାକୁ ଥିବାରୁ ସେତେବେଳକୁ ରୋହିତ ପୂରା ପ୍ରସ୍ତୁତ ହୋଇଯାଇଥିବେ ବୋଲି କୁହାଯାଉଛି।
