ଅଷ୍ଟମୀ ଭାର ନେଇ ଝିଅ ଘରକୁ ଯାଉଥିଲେ ବାପା, ଦୁର୍ଘଟଣାରେ ଗୁରୁତର

ସାଲେପୁର, ୧୬/୧୧: ମର୍ମନ୍ତୁଦ ସଡକ ଦୁର୍ଘଟଣାରେ ଜଣେ ସ୍କୁଟି ଚାଳକ ଗୁରୁତର ହୋଇଛନ୍ତି । କଟକ-ଚାନ୍ଦବାଲି ରାସ୍ତାର ସାଲେପୁର ସପନପୁର ଧବଳେଶ୍ବର ମନ୍ଦିର ନିକଟରେ ଏହି ଦୁର୍ଘଟଣା ଘିଟିିଛି । ସ୍କୁଟି ଚାଳକ ଜଣକ ମାହାଙ୍ଗା ସବଳକଣାର ଅମିକେଶ୍ୱର ମହାପାତ୍ର ବୋଲି ଜଣାପଡ଼ିଛି । ଅମିକେଶ୍ୱର ନିଜ ସ୍କୁଟି ଯୋଗେ ଆଜି ସକାଳୁ ଝିଅଘରକୁ ଅଷ୍ଟମୀ ତିଥି ପାଇଁ ଭାର ନେଇ ଯାଉଥିବା ବେଳେ ଭାରସାମ୍ୟ ହରାଇ ରାସ୍ତାପାର୍ଶ୍ୱରେ ଥିବା ବାରିକେଟରେ ବାଡେଇ ହୋଇ ଗୁରୁତର ହୋଇ ପଡିଥିଲେ । ଘଟଣା ସ୍ଥଳରୁ ତାଙ୍କୁ ସ୍ଥାନୀୟ ଲୋକେ ଗୁରୁତର ଅବସ୍ଥାରେ ଉଦ୍ଧାର କରି ଆମ୍ବୁଲାନ୍ସ ଯୋଗେ ମେଡିକାଲରେ ଭର୍ତ୍ତି କରିଛନ୍ତି । ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ସୂଚନା ମିଳିଛି ।