ଇଟାନଗର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଅରୁଣାଚଳ ପ୍ରଦେଶରେ ବିଶ୍ୱର ସବୁଠାରୁ ଲମ୍ବା ଦୁଇ ଲେନ୍-ବିଶିଷ୍ଟ ‘ସେଲା ଟନେଲ’କୁ ଉଦ୍ଘାଟନ କରିଛନ୍ତି। ୧୩,୦୦୦ ଫୁଟ ଉଚ୍ଚତାରେ ଅବସ୍ଥିତ ତଥା ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଏହି ସେଲା ଟନେଲ ଅରୁଣାଚଳ ପ୍ରଦେଶର ତୱାଙ୍ଗକୁ ସର୍ବକାଳୀନ ଯୋଗାଯୋଗକୁ ସୁନିଶ୍ଚିତ କରିବ। ସୁଡ଼ଙ୍ଗ ଉଦ୍ଘାଟନ ପରେ ପ୍ରଧାନମନ୍ତ୍ରୀ ମୋଦୀ ତାଙ୍କ ଭାଷଣରେ କହିଥିଲେ, ‘ଆପଣ ନିଶ୍ଚୟ ‘ମୋଦୀ କି ଗ୍ୟାରେଣ୍ଟି’ ବିଷୟରେ ଶୁଣିଥିବେ। ଅରୁଣାଚଳ ଆସିଲେ ଆପଣ ଏହାର ମହତ୍ତ୍ୱ ବୁଝିପାରିବେ। ସମଗ୍ର ଉତ୍ତର-ପୂର୍ବ ଏହାର ସାକ୍ଷୀ। ୨୦୧୯ରେ ମୁଁ ଏଠାରେ ସେଲା ଟନେଲର ଭିତ୍ତିପ୍ରସ୍ତର ସ୍ଥାପନ କରିଥିଲି ଏବଂ ଆଜି ଏହାକୁ ଉଦ୍ଘାଟନ କରାଯାଇଛି।
୨୦୧୯ ଫେବ୍ରୁଆରି ମାସରେ ପ୍ରଧାନମନ୍ତ୍ରୀ ମୋଦୀ ଏହି ପ୍ରକଳ୍ପର ଶିଳାନ୍ୟାସ କରିଥିଲେ, କିନ୍ତୁ କୋଭିଡ୍-୧୯ ମହାମାରୀ କାରଣରୁ ଏହା ସମ୍ପୂର୍ଣ୍ଣ ହେବାରେ ବିଳମ୍ବ ହୋଇଥିଲା। ୮୨୫ କୋଟି ଟଙ୍କା ବ୍ୟୟରେ ନିର୍ମିତ ଏହି ପ୍ରକଳ୍ପରେ ଦୁଇଟି ସୁଡ଼ଙ୍ଗ ଓ ୮ କିଲୋମିଟରରୁ ଅଧିକ ଆପ୍ରୋଚ୍ ରୋଡ୍ ରହିଛି, ଯାହାର ମୋଟ ଦୈର୍ଘ୍ୟ ପ୍ରାୟ ୧୨ କିଲୋମିଟର। ପ୍ରଥମ ସୁଡ଼ଙ୍ଗ ହେଉଛି ୯୮୦ ମିଟର ବ୍ୟାପୀ ଏକକ ଟ୍ୟୁବ୍ ଟନେଲ ଏବଂ ଦ୍ୱିତୀୟ ସୁଡ଼ଙ୍ଗ ୧.୫ କିଲୋମିଟର ଲମ୍ବବିଶିଷ୍ଟ ଜରୁରିକାଳୀନ ପଳାୟନ ପଥ ଭାବରେ କାର୍ଯ୍ୟ କରେ। ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି) ନିକଟରେ ଅବସ୍ଥିତ ସେଲା ଟନେଲ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ, ଯାହା ଚୀନ୍ ସୀମାରେ ଥିବା ତୱାଙ୍ଗ ଏବଂ ଅନ୍ୟାନ୍ୟ ଅଞ୍ଚଳକୁ ବର୍ଷସାରା ଯାତାୟାତ ସୁବିଧା ପ୍ରଦାନ କରିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଉତ୍ତର-ପୂର୍ବାଞ୍ଚଳରେ ୫୫,୬୦୦ କୋଟି ଟଙ୍କାର ପ୍ରକଳ୍ପର ଲୋକାର୍ପଣ କରିଛନ୍ତି। ଇଟାନଗରରେ ଏକ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମଣିପୁର, ମେଘାଳୟ, ନାଗାଲାଣ୍ଡ, ସିକିମ, ତ୍ରିପୁରା ଓ ଅରୁଣାଚଳ ପ୍ରଦେଶରେ ଥିବା ପ୍ରକଳ୍ପଗୁଡ଼ିକୁ ଉନ୍ମୋଚନ କରିଥିଲେ। ପ୍ରଧାନମନ୍ତ୍ରୀ ଏକ ଅରୁଣାଚଳ ପ୍ରଦେଶ ରାଜ୍ୟ ପରିବହନ ବସ୍କୁ ପତାକା ଦେଖାଇ ସେଲା ଟନେଲର ଉଦ୍ଘାଟନ କରିଥିଲେ, ଯାହା ଏହି ଟନେଲ ବାଟ ଦେଇ ଯାଇଥିଲା।
