ନୂଆଦିଲ୍ଲୀ, ୦୩/୦୧: ଦୀର୍ଘ ଦିନ ହେବ ନୀରବ ପଡିଛି ବିରାଟଙ୍କ ବ୍ୟାଟ୍ । ବାହାରୁନି ବଡ ସ୍କୋର । ସମାଲୋଚନା ମଧ୍ୟ କରାଯାଉଛି । ଏହାମଧ୍ୟରେ ଭାରତୀୟ ଦଳର କୋଚ୍ ରାହୁଲ ଦ୍ରାବିଡ ବିରାଟଙ୍କୁ ନେଇ ବଡ ପ୍ରତିକ୍ରିୟା ଦେଇଛନ୍ତି । ବିରାଟ ବହୁତ ଜଲଦି ବଡ ସ୍କୋର କରିବେ ବୋଲି ଦ୍ରାବିଡ କହିଛନ୍ତି ।
୨୦୨୦ ଆରମ୍ଭରୁ ବିରାଟ ୧୪ଟି ଟେଷ୍ଟ୍ ଖେଳି ସାରିଛନ୍ତି । ଏଥିରେ ତାଙ୍କର ଆଭରେଜ୍ ରହିଛି ୨୬.୦୮ । ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟରେ ସେ ଭଲ ଆରମ୍ଭ କରିଥିଲେ ବି ବଡ ସ୍କୋର କରିବାରେ ବିଫଳ ହୋଇଥିଲେ ।
ତେବେ ଦ୍ରାବିଡ କହିଛନ୍ତି ଯେ, ବିରାଟ ଭଲ ବ୍ୟାଟିଂ କରିଥିଲେ ବି ବଡ ସ୍କୋର କରିପାରି ନଥିଲେ । ଆଗାମୀ ଦିନରେ ତାଙ୍କ ବ୍ୟାଟ୍ ଗର୍ଜିବ । ସେ ବଡ ସ୍କୋର କରିବେ । ତାଙ୍କୁ ଡ୍ରେସିଂ ରୁମରେ ଦେଖିଲେ ସକରାତ୍ମକ ମାହୋଲ ସୃଷ୍ଟି ହେଉଛି । ତାଙ୍କ ଭଳି ବ୍ୟାଟସମ୍ୟାନ୍ ଥରେ ଲୟ ଧରିଲେ ବଡ ସ୍କୋର କରିବା କ୍ଷମତା ରଖନ୍ତି । ଅନେକ ପ୍ରତିକୂଳ ପରିସ୍ଥିତି ସତ୍ତ୍ୱେ ସେ ଭଲ ନେତୃତ୍ୱ ନେଇଛନ୍ତି ।
କେବଳ ବିରାଟ ନୁହେଁ, ଚେତେଶ୍ୱର ପୂଜାରାଙ୍କ ଆଭରେଜ୍ ମଧ୍ୟ ୨୬.୨୧ ରହିଛି । ଏହା ମଧ୍ୟରେ ସେ ୭ଟି ଅର୍ଧଶତକ ଲଗାଇଛନ୍ତି । ଅନେକ ଥର ପୂଜାରା କଠିନ ପରିସ୍ଥିତିରେ ବଡ ସ୍କୋର କରିବା ସହ ଭଲ ଖେଳିଛନ୍ତି । ସେ ନିଜର ୧୦ ବର୍ଷର ଟେଷ୍ଟ କ୍ୟାରିଅରର ଅନେକ ବଡ ସଫଳତା ହାସଲ କରିଛନ୍ତି ବୋଲି ଦ୍ରାବିଡ କହିଛନ୍ତି ।
