ରାୟଗଡା : ନିୟମଗିରି ପାହାଡ଼ରେ ବସବାସ କରୁଛନ୍ତି ଆଦିମ ଜନଜାତି ଡଙ୍ଗରିଆ କନ୍ଧ। ଏହି ଜନଜାତିଙ୍କ ଉତ୍ଥାନ ପାଇଁ ସରକାରଙ୍କ ଏକାଧିକ ସଂସ୍ଥା କାର୍ଯ୍ୟ କରୁଛି। କିନ୍ତୁ, ସରକାରୀ ସଂସ୍ଥା ହିତ ବଦଳରେ କେଉଁ ଭଳି ଜନଜାତିଙ୍କୁ ପ୍ରତାରିତ ଏବଂ ଶୋଷଣ କରୁଛନ୍ତି ତାହାକୁ ଆଜି ଡଙ୍ଗରିଆ କନ୍ଧ ମହିଳା ଚାଷୀ ଟିମି ପୁଷିକା ସାମ୍ନାକୁ ଆଣିଛନ୍ତି। ରାୟଗଡ଼ା ଜିଲ୍ଲା ପ୍ରଶାସନକୁ ଲାଞ୍ଚ ଟଙ୍କା ମିଳିଲା ନା ନାହିଁ ବୋଲି ଟିମି ସିଧାସଳଖ ପଚାରିଛନ୍ତି। ଶୁଣିବାକୁ ପ୍ରଥମେ ଅଜବ ଲାଗିଥିଲା, କିନ୍ତୁ ଦୁର୍ନୀତିର ପେଡ଼ି ଖୋଲିବା ପରେ ଅଧିକାରୀ ସ୍ତବ୍ଧ ହୋଇଯାଇଥିଲେ।
ବିଷମକଟକ ବ୍ଲକ୍ ଚାଞ୍ଚଡାଗୁଡା ପଞ୍ଚାୟତ ଅନ୍ତର୍ଗତ ନିୟମଗିରି ପାହାଡ ପାଦଦେଶରେ ଅବସ୍ଥିତ ବାଲାପାଇ ଗାଁରେ ଟିମି ପୁଷିକାଙ୍କ ଘର। ଜନଜାତି ଶ୍ରେଣୀର ମହିଳାଙ୍କୁ ସ୍ବାବଲମ୍ବୀ କରିବା ଉଦ୍ଦେଶ୍ୟରେ ତାଙ୍କୁ ୨୭ ହଜାର ଟଙ୍କା ମିଳିଥିଲା। ଡିକେଡିଏ ଅଧୀନରେ କାର୍ଯ୍ୟ କରୁଥିବା ଓଡ଼ିଶା ଆଦିବାସୀ ଜନଜାତି ସଶକ୍ତୀକରଣ ଓ ଜୀବିକା ଉନ୍ନତୀକରଣ (ଓପିଲିପି) ପକ୍ଷରୁ ଏହି ଟଙ୍କା ଦିଆଯାଇଥିଲା। ଟଙ୍କା ଆକାଉଣ୍ଟରେ ଜମା ହେବାର କିଛିଦିନ ପରେ ଓପିଲିପି ଅଧିକାରୀ ତାଙ୍କ ଘରେ ପହଞ୍ଚିଥିଲେ। ବ୍ୟବସାୟ କରିବାକୁ ନିଜ ଆଡ଼ୁ ଗୋଟିଏ ଡିଜିଟାଲ୍ ନିକିତି ଦେଇଥିଲେ, ଯାହାର ମୂଲ୍ୟ ୭ହଜାର ୯ଶହ ଟଙ୍କା। ସେହିପରି ୫୫୦୦ ଟଙ୍କା ମୂଲ୍ୟର ଗୋଟିଏ ସାଇକଲ ଏବଂ ୮ଶହ ଟଙ୍କା ମୂଲ୍ୟର ଦୁଇ ପ୍ଲାଷ୍ଟିକ୍ ଚୌକି ଦେଇ ସମୁଦାୟ ୧୪୨୦୦ ଟଙ୍କା ମାଗି ନେଇଥିଲେ। ଏହାପରେ ଲାଞ୍ଚ ବାବଦରେ ପୁଣି ୬୫୦୦ ଟଙ୍କା ତାଙ୍କୁ ମଗାଯାଇଥିଲା। ଅଧିକାରୀଙ୍କୁ ଏହି ଟଙ୍କା ଦେବାକୁ ପଡ଼ିବ ବୋଲି ଦୁଇଜଣ କର୍ମଚାରୀ ଭିଡିଓ କଲ୍ କରି କହିବାରୁ ଟଙ୍କା ଦେବାକୁ ବାଧ୍ୟ ହୋଇଥିଲେ। ବ୍ୟବସାୟ ଆରମ୍ଭ କରିବା ପୂର୍ବରୁ ହିଁ ସାମଗ୍ରୀ ଏବଂ ଲାଞ୍ଚ ବାବଦରେ ୨୦ହଜାର ୭ଶହ ଟଙ୍କା ନିଆଗଲା। ବଳକା ଟଙ୍କାରେ ଆଉ ବ୍ୟବସାୟ କରିବା ତାଙ୍କ ପକ୍ଷେ ସମ୍ଭବ ହୋଇନଥିଲା।
ସରଳତାର ସୁଯୋଗ ନେଇ ଓପିଲିପି ଅଧିକାରୀ ଟଙ୍କା ହଡ଼ପ କରିଥିବା ପରବର୍ତ୍ତୀ ସମୟରେ ଜାଣିବା ପରେ ନିଜକୁ ଆଉ ସମ୍ଭାଳି ପାରିନଥିଲେ ଟିମି। ତେଣୁ ନିୟମଗିରି ପାହାଡ଼ରୁ ଆଜି ସକାଳୁ ସକାଳୁ ନିଜ ଯନ୍ତ୍ରଣା ଜଣାଇବା ପାଇଁ ରାୟଗଡ଼ା ଆସିଥିଲେ। ପ୍ରଥମେ ଜିଲ୍ଲାପାଳଙ୍କୁ ଖୋଜିଥିଲେ। ପାଇନଥିଲେ, ଏହାପରେ ଖୋଜାଖୋଜି କରିବାରୁ ଅତିରିକ୍ତ ଜିଲ୍ଲାପାଳ ଧର୍ମାନନ୍ଦ ବେହେରାଙ୍କ ସହ ଭେଟ ହୋଇଥିଲା। ଏହାପରେ ନିଜ ଭାଷାରେ ବେଦନାକୁ ଅନର୍ଗଳ ଭାବେ ବଖାଣିଲେ। ଅତି ସରଳ ଭାଷାରେ ପଚାରିଥିଲେ, ‘ବାବୁ ଲାଞ୍ଚ ଟଙ୍କା ପଠାଇଥିଲି, ତତେ ମିଳିଲା କି?’ ଅଫିସରଙ୍କୁ ଟଙ୍କା ଦେବେ ବୋଲି ରମେଶ ନାଲା ଓ ସହଦେବ ମାଗିଥିଲେ। ତେଣୁ ଟଙ୍କା ମିଳିଲା ନା ନାହିଁ ଜାଣିବା ପାଇଁ ଆସିଥିବା କହିଥିଲେ। ଏଭଳି ପ୍ରଶ୍ନର ସମ୍ମୁଖୀନ ହେବେ ବୋଲି ଆଦୌ କଳ୍ପନା କରିନଥିଲେ ଅତିରିକ୍ତ ଜିଲ୍ଲାପାଳ। ଉତ୍ତର ଦେବାକୁ ବି ତାଙ୍କ ନିକଟରେ ଶବ୍ଦ ନଥିଲା। ପୁଣି କହିଥିଲେ, ଗାଁର ଛୋଟଛୋଟ ପିଲାଙ୍କୁ ରୋଷେଇ କରି ଖାଇବାକୁ ଦେଇଥିଲେ। କିନ୍ତୁ ୧୪ମାସ ଧରି ଟଙ୍କାଟିଏ ବି ମଜୁରି ମିଳିଲା ନାହିଁ। ପୁଷ୍ଟି ସାଧନ ଯୋଜନାରେ ମାସିକ ୩ହଜାର ଟଙ୍କା ଦେବାକୁ କହି ପ୍ରତାରିତ କରାଯାଇଛି। ଓପିଲିପି ଅଧିକାରୀଙ୍କୁ ବାରମ୍ବାର ଅଭିଯୋଗ କରିବା ସତ୍ତ୍ବେ କେହି ଶୁଣିନଥିଲେ। ତେଣୁ ନିଜ ଭାଇକୁ ଧରି ପାହାଡ଼ ଛାଡ଼ି ସହରକୁ ଆସିଥିବା କ୍ଷୋଭର ସହ କହିଥିଲେ। ପ୍ରଶାସନ ସବୁ କଥା ଶୁଣିଥିଲା, ଆଗକୁ କ’ଣ ପଦକ୍ଷେପ ନେଉଛି ଦେଖିବାକୁ ବାକି ରହିଲା।
