ଆଠଗଡ ୨୫/୦୬: ଆଠଗଡ଼ ଥାନା ଜେନାପଦା ଶାଳବଣୀ ଜଙ୍ଗଲ ମଧ୍ୟରେ ଜଣେ ଅଜଣା ମହିଳାଙ୍କ ଗଳିତ ମୃତଦେହ ଉଦ୍ଧାର ଘଟଣାରେ ଏଯାଏଁ ପରିଚୟ ମିଳିପାରି ନାହିଁ । ମହିଳାଙ୍କୁ କେହି ହତ୍ୟା କରି ଜଙ୍ଗଲରେ ଫୋପାଡି ଦେଇଥିବା ଆଶଙ୍କା କରାଯାଉଛି ।
ସୂଚନା ଥାଉକି, ଆଠଗଡ଼ ଥାନା ୬୫ ନମ୍ବର ରାଜ୍ୟ ରାଜପଥ ଜେନାପଦା ଶାଳବଣୀ ଜଙ୍ଗଲ ମଧ୍ୟରେ ଜଣେ ମହିଳାଙ୍କ ଗଳିତ ମୃତଦେହ ସ୍ଥାନୀୟ ଲୋକ ଦେଖି ଆଠଗଡ଼ ପୋଲିସକୁ ଖବର ଦେବାପରେ ପୋଲିସ ଘଟଣା ସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଥିଲା ।
ଗତକାଲି ସାଇଣ୍ଟଫିକ୍ ଟିମ୍ ଘଟଣାସ୍ଥଳକୁ ଯାଇ ତଦନ୍ତ କରିବା ସହ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ କଟକ ବଡ଼ ଡ଼ାକ୍ତରଖାନାକୁ ପଠାଯାଇ ଥିବା ପୋଲିସ କହିଛି । ତେବେ ବ୍ୟବଚ୍ଛେଦ ପରେ ହତ୍ୟା କି ଆତ୍ମହତ୍ୟା କେଉଁ ସମୟରେ ହୋଇଛି ତାହା ସ୍ପଷ୍ଟ ହେବ ବୋଲି ଆଇଆଇସି କହିଛନ୍ତି ।
