କୋଲକାତା: କୋଲକାତା ହାଇକୋର୍ଟ କହିଛନ୍ତି ଯେ କୌଣସି ଅଜଣା ମହିଳାଙ୍କୁ ‘ଡାର୍ଲିଂ’ କହିବା ଆପତ୍ତିଜନକ ଏବଂ ଏହା ଭାରତୀୟ ପିଙ୍ଗଳ କୋଡ୍ (ଆଇପିସି)ର ଧାରା ୩୫୪ଏ (ମହିଳାଙ୍କୁ ଅପମାନିତ କରିବା) ଏବଂ ୫୦୯ ଅନୁଯାୟୀ ଏକ ଅପରାଧ ଭାବେ ବିବେଚିତ ହେବ। ହାଇକୋର୍ଟର ପୋର୍ଟ ବ୍ଲେୟାର ଖଣ୍ଡପୀଠର ଏକକ ବିଚାରପତି ଜଷ୍ଟିସ ଜୟ ସେନଗୁପ୍ତା ଏହି ରାୟ ଶୁଣାଇଛନ୍ତି। ଜଣେ ମହିଳା କନଷ୍ଟେବଳଙ୍କୁ ନିଶାସକ୍ତ ଅବସ୍ଥାରେ ‘ଡାର୍ଲିଂ’ ବୋଲି କହିଥିବା ଜନକ ରାମ ନାମକ ଜଣେ ବ୍ୟକ୍ତିଙ୍କୁ ଦୋଷୀ ସାବ୍ୟସ୍ତ କରିବା ଅବସରରେ ଅଦାଲତ ଏହି ମନ୍ତବ୍ୟ ଦେଇଛନ୍ତି। ଜଷ୍ଟିସ୍ ସେନଗୁପ୍ତା କହିଛନ୍ତି ଯେ ଧାରା ୩୫୪ଏରେ ମହିଳାଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ବ୍ୟବହାରକୁ ଅପରାଧିକ କାର୍ଯ୍ୟ ଭାବେ ବିବେଚନା କରାଯାଇଛି ଏବଂ ଏ କ୍ଷେତ୍ରରେ ତାହା ଯଥୋଚିତ ଭାବେ ଲାଗୁ ହେବ। ଖଣ୍ଡପୀଠ କହିଛନ୍ତି ଯେ ଜଣେ ଅଜଣା ମହିଳାଙ୍କୁ ‘ଡାର୍ଲିଂ’ ଶବ୍ଦ ରେ ସମ୍ବୋଧିତ କରିବା ଅତ୍ୟନ୍ତ ଆପତ୍ତିଜନକ ଏବଂ ବ୍ୟବହୃତ ଶବ୍ଦଟି ଏକ ଯୌନ ଉତ୍ପୀଡ଼କ ମନ୍ତବ୍ୟ। ଜଷ୍ଟିସ ସେନଗୁପ୍ତା କହିଛନ୍ତି, ବର୍ତ୍ତମାନ ପର୍ଯ୍ୟନ୍ତ ଭାରତୀୟ ସମାଜର ମାନଦଣ୍ଡ ଏପରି ନୁହେଁ ଯେ ଜଣେ ପୁରୁଷକୁ ‘ ଅପରିଚିତ ମହିଳାଙ୍କ’ ସମ୍ପର୍କରେ ‘ଡାର୍ଲିଂ’ ଶବ୍ଦର ବ୍ୟବହାର ଭଳି ଅଭିବ୍ୟକ୍ତି ପାଇଁ ଅନୁମତି ଦିଆଯାଇପାରିବ। କୋର୍ଟ କହିଛନ୍ତି ଯେ ଯଦି ଆବେଦନକାରୀ ଶାନ୍ତ ଅବସ୍ଥାରେ ଥିବା ବେଳେ ଏହି ଘଟଣା ଘଟିଥାନ୍ତା, ତେବେ ଅପରାଧର ଗମ୍ଭୀରତା ବୋଧହୁଏ ଆହୁରି ଅଧିକ ହୋଇଥାନ୍ତା। ସେ ମଦ ନିଶାରେ କହିଥିବା ପ୍ରମାଣିତ ହୋଇଛି।
