ନୂଆଦିଲ୍ଲୀ ୨୩/୦୪: ହସ୍ପିଟାଲରେ ଅକ୍ସିଜେନ୍ ଅଭାବ ହେତୁ ଡାକ୍ତରମାନେ ମଧ୍ୟ ସାହସ ହରାଇବାକୁ ବସିଲେଣି । ଏପରି ଅନେକ ଭିଡିଓ ସାମ୍ନାକୁ ଆସିଛି ଯେଉଁଠାରେ ହସ୍ପିଟାଲ୍ ମ୍ୟାନେଜମେଣ୍ଟ୍ କିମ୍ବା ଡାକ୍ତରମାନେ କରୋନାରେ ଅକ୍ସିଜେନ୍ ସରିଯିବା ଭୟରେ କାନ୍ଦୁଥିବା ଦେଖିବାକୁ ମିଳିଛି । ଦିଲ୍ଲୀର ଶାନ୍ତି ସୁକାନ୍ତ ହସ୍ପିଟାଲର ସିଇଓ ସୁନୀଲ ସାଗରଙ୍କ ଏହିପରି ଭିଡିଓ ଦେଖି ସୁସ୍ମିତା ସେନ୍ ଦୁଃଖ ପ୍ରକାଶ କରିଛନ୍ତି । ସେ ଅକ୍ସିଜେନ୍ ପଠାଇବାକୁ ଇଚ୍ଛା ପ୍ରକାଶ କରିଛନ୍ତି । ଏହା ଉପରେ ଜଣେ ୟୁଜର୍ ପ୍ରଶ୍ନ କରିଛନ୍ତି ଯେ ମୁମ୍ବାଇରେ ମଧ୍ୟ ଅଭାବ ଅଛି, ତେବେ ସେ କାହିଁକି ଦିଲ୍ଲୀ ସିଲିଣ୍ଡର ପଠାଇବାକୁ ଚାହୁଁଛନ୍ତି? ସୁସ୍ମିତା ମଧ୍ୟ ଏହାର ଜବାବ ଦେଇଛନ୍ତି ।
ଭିଡିଓକୁ ରିଟ୍ୱିଟ କରି ସୁସ୍ମିତା ସେନ୍ ଲେଖିଛନ୍ତି, ‘ଏହା ଅତ୍ୟନ୍ତ ହୃଦୟ ବିଦାରକ … ଅକ୍ସିଜେନର ଅଭାବ ସବୁଠାରେ ଅଛି । ମୁଁ କିଛି ସିଲିଣ୍ଡର ବ୍ୟବସ୍ଥା କରିଛି କିନ୍ତୁ ସେମାନଙ୍କୁ ଦିଲ୍ଲୀରୁ ମୁମ୍ବାଇ ପଠାଇବା ପାଇଁ କୌଣସି ଉପାୟ ନାହିଁ… ଦୟାକରି କିଛି ଉପାୟ ପରାମର୍ଶ ଦିଅନ୍ତୁ ।‘ ଭିଡିଓରେ ସୁନୀଲ ସାଗର କହିଛନ୍ତି, ‘ଆମ ପାଖରେ ଅକ୍ସିଜେନ୍ ବହୁତ କମ୍ ଅଛି । ଡିସଚାର୍ଜ ହୋଇପାରୁଥିବା ରୋଗୀଙ୍କୁ ଡିସଚାର୍ଜ କରିବାକୁ ଆମେ ଡାକ୍ତରମାନଙ୍କୁ ଅନୁରୋଧ କରିଛୁ … ଅକ୍ସିଜେନ୍ ପ୍ରାୟ ୨ ଘଣ୍ଟା ଚାଲିବ ।‘
ସୁସ୍ମିତାଙ୍କ ଏହି ଟ୍ୱିଟରେ ଅନେକ ଲୋକ ଦିଲ୍ଲୀ ଅକ୍ସିଜେନ୍ ପଠାଇବାକୁ ଉପାୟ କହିଛନ୍ତି । ଜଣେ ୟୁଜର୍ ଲେଖିଛନ୍ତି ଯେ ଯେତେବେଳେ ଅକ୍ସିଜେନର ଅଭାବ ସବୁଆଡେ ଅଛି, ତୁମେ ଏହାକୁ ମୁମ୍ବାଇର ଏହିପରି ହସ୍ପିଟାଲକୁ ପଠାଇବା ପରିବର୍ତ୍ତେ ଦିଲ୍ଲୀକୁ କାହିଁକି ପଠାଉଛ? ସୁସ୍ମିତା ଏହାର ଜବାବରେ କହିଛନ୍ତି, କାରଣ ମୁମ୍ବାଇରେ ଏବେବି ଅକ୍ସିଜେନ୍ ସିଲିଣ୍ଡର ଅଛି । ଦିଲ୍ଲୀକୁ ଏହାର ଆବଶ୍ୟକତା ଅଛି ବିଶେଷ ଭାବରେ ଏହି ଛୋଟ ହସ୍ପିଟାଲକୁ । ତେଣୁ ଯଦି ସାହାଯ୍ୟ କରିପାରିବେ କରନ୍ତୁ ।
