ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାର ଗରିବ ଲୋକଙ୍କୁ ୧ ବର୍ଷ ପାଇଁ ମାଗଣା ଖାଦ୍ୟଶସ୍ୟ ବର୍ଷେ ପାଇଁ ଯୋଗାଇ ଦେବେ ବୋଲି ଯେଉଁ ଘୋଷଣା କରିଛନ୍ତି ତାହା ଉପରେ କଂଗ୍ରେସ ଆପତ୍ତି ଉଠାଇଛି। ଏହି ଘୋଷଣା କରି ମୋଦୀ ସରକାର ଦେଶର ୮୧ କୋଟି ଗରିବଙ୍କ ଖାଦ୍ୟଶସ୍ୟ ବା ରାସନ ଯୋଗାଣକୁ ୫୦ ପ୍ରତିଶତ କମାଇ ଦେଇଛନ୍ତି। ୮୧ କୋଟି ଗରିବ ଲୋକ ମାସକୁ ୧୦ କିଗ୍ରା ମାଗଣା ଖାଦ୍ୟଶସ୍ୟ ପାଇବାକୁ ହକ୍ଦାର ହୋଇଥିବା ବେଳେ ସରକାର ଏବେ ସେମାନଙ୍କୁ କେବଳ ୫ କିଗ୍ରା ଖାଦ୍ୟଶସ୍ୟ ଯୋଗାଇ ଦେବେ ବୋଲି କଂଗ୍ରେସ ସାଧାରଣ ସଂପାଦକ ଜୟରାମ ରମେଶ କହିଛନ୍ତି। ରାଜ୍ୟ ସରକାରଙ୍କ ସହିତ ବିଚାରବିମର୍ଶ କିମ୍ବା ସଂସଦରେ କୌଣସି ଆଲୋଚନା ନକରି ଏହାକୁ ହଠାତ୍ ବନ୍ଦ କରି ଦିାଯାଇଛି ବୋଲି ରମେଶ କହିଛନ୍ତି। କରୋନା ମହାମାରୀ ପାଇଁ କେନ୍ଦ୍ର ସରକାର ପିଏମଜିକେଏୱାଇରେ ୨୮ ମାସ ଧରି ମାଗଣା ଖାଦ୍ୟଶସ୍ୟ ଯୋଗାଇ ଆସୁଥିଲେ। ତେବେ କ୍ୟାବିନେଟ୍ ନିଷ୍ପତ୍ତି ନେଇଛି ଯେ ୮୧.୩୫ କୋଟି ଏନଏଫଏସଏ ହିତାଧିକାରୀଙ୍କୁ ୨୦୨୩ରେ ମାଗଣା ଖାଦ୍ୟଶସ୍ୟ ଯୋଗାଇ ଦିଆଯିବ।
ଏହାସହିତ ପ୍ରଧାନମନ୍ତ୍ରୀଙ୍କୁ ୟୁ-ଟର୍ଣ୍ଣ ମାଷ୍ଟର ବୋଲି ରମେଶ କହିଛନ୍ତି। ଉପା ସରକାର ଅମଳରେ ମୋଦୀ ଏମଜିଏନଆରଇଜିଏ ଏବଂ ଏନଏଫଏସଏ ଭଳି ଯୋଜନାକୁ ବିରୋଧ କରୁଥିଲେ। କିନ୍ତୁ ଏବେ ଏଥିପାଇଁ ଶ୍ରେୟ ନେଉଛନ୍ତି। ମୋଦୀ ସରକାରଙ୍କୁ ମନେ ପକାଇ ଦିଆଯିବା ଆବଶ୍ୟକ ଯେ ଏନଏଫଏସଏରେ ଲୋକଙ୍କୁ ଖାଦ୍ୟଶସ୍ୟ ଯୋଗାଇବା ଏକ ଉପହାର ନୁହେଁ, ଏହା ସେମାନଙ୍କ ଅଧିକାର। ପିଏମଜିକେଏୱାଇକୁ ବନ୍ଦ କରି ମୋଦୀ ସରକାର ଯେଉଁ ୧ ଲକ୍ଷ କୋଟି ଟଙ୍କା ସଞ୍ଚୟ କରିଛନ୍ତି ତାହାକୁ ଖାଦ୍ୟ ସୁରକ୍ଷା ଆଇନକୁ ବିଭିନ୍ନ ଉପାୟରେ ସୁଦୃଢ଼ କରିବାକୁ ସେ ପରାମର୍ଶ ଦେଇଛନ୍ତି।
