ନୂଆଦିଲ୍ଲୀ: ୨୦୨୦ରେ ଉତ୍ତରପୂର୍ବ ଦିଲ୍ଲୀ ଅଞ୍ଚଳରେ ହୋଇଥିବା ଦଙ୍ଗା ମାମଲାରେ ଦିଲ୍ଲୀର ଏକ କୋର୍ଟ ୯ ଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରି ସେମାନଙ୍କୁ ୭ ବର୍ଷର ସଶ୍ରମ କରାଦଣ୍ଡାଦେଶ ଶୁଣାଇଛନ୍ତି। କୋର୍ଟ କହିଛନ୍ତି ଯେ ଦଙ୍ଗା ନାଗରିକଙ୍କ ଭିତରେ ଭାଇଚାରା ଭାବ ନଷ୍ଟ କରିଥାଏ। ଦଙ୍ଗା ଭିଆଣ ଦ୍ବାରା ଉକ୍ତ ଲୋକମାନେ ସାମାଜିକ ସଦ୍ଭାବ, ଅର୍ଥନୀତି ଓ ଦେଶର ସ୍ଥିରତା ପ୍ରତି ବିପଦ ପହଞ୍ଚାଇଛନ୍ତି ଏବଂ ଲୋକଙ୍କ ଭିତରେ ଅସୁରକ୍ଷାର ଭାବ ସୃଷ୍ଟି କରିଛନ୍ତି। ଅତିରିକ୍ତ ଦୌରା ଜଜ୍ ପୁଲସ୍ତ୍ୟ ପ୍ରମାଚାଲା ମଙ୍ଗଳବାର ମହମ୍ମଦ ଶାହନୱାଜ, ମହମ୍ମଦ ଶୋଏବ, ଶାହରୁଖ, ରଶିଦ, ଆଜାଦ, ଅଶରଫ ଅଲି ପରଭେଜ, ମହମ୍ମଦ ଫୈଜଲ ଓ ରଶିଦଙ୍କୁ ଦଙ୍ଗା ପାଇଁ ଦଣ୍ଡାଦେଶ ଦେଇଥିଲେ।
ମାର୍ଚ୍ଚ ୧୩ ତାରିଖରେ କୋର୍ଟ ୯ ଅଭିଯୁକ୍ତଙ୍କୁ ଆଇପିସିର ବିଭିନ୍ନ ଧାରାରେ ଦୋଷୀ ସାବ୍ୟସ୍ତ କରିଥିବା ବେଳେ ଆଜି ପ୍ରତ୍ୟେକଙ୍କୁ ୭ ବର୍ଷର ସଶ୍ରମ କାରାଦଣ୍ଡାଦେଶ ସହ ୨୦,୦୦୦ ଟଙ୍କା ଲେଖାଏ ଜରିମାନା କରିଛନ୍ତି। ଏହି ଜରିମାନା ଅର୍ଥରୁ ଦେଢ଼ ଲକ୍ଷ ଟଙ୍କା ଦଙ୍ଗାପୀଡ଼ିତମାନଙ୍କୁ କ୍ଷତିପୂରଣ ଆକାରରେ ଦିଆଯିବ ବୋଲି ଏଏସ୍ଜି କହିଥିଲେ। ଯେଉଁମାନେ ଜରିମାନା ଦେବେ ନାହିଁ, ସେମାନେ ଅତିରିକ୍ତ ଦେଢ଼ ବର୍ଷର ଜେଲଦଣ୍ଡ ଭୋଗିବେ ବୋଲି କୋର୍ଟ କହିଛନ୍ତି।
