ଦୁବାଇ,୨୫|୧୦: ବିଜୟ ଲକ୍ଷ୍ୟ ଥିଲା ମାତ୍ର ୧୨୭ । ସନରାଇଜର୍ସ ହାଇଦ୍ରାବାଦ ପାଇଁ ଏହି ଲକ୍ଷ୍ୟ ବଡ ନଥିଲା । କିନ୍ତୁ ଦଳର କୌଣସି ବ୍ୟାଟସମ୍ୟାନ୍ ପଞ୍ଜାବ ବୋଲରଙ୍କୁ ସାମ୍ନା କରି ପାରିନଥିଲେ । ଦଳର ବ୍ୟାଟିଂ ଅର୍ଡର ତାସ୍ ପତା ଭଳି ଭୁଷୁଡି ପଡିଥିଲା । ଫଳରେ ହାଇଦ୍ରାବାଦ ମାତ୍ର ୧୨ ରନରେ ପଞ୍ଜାବଠୁ ପରାସ୍ତ ହୋଇଥିଲା ।
ଶନିବାର ଦୁବାଇରେ ଖେଳାଯାଇଥିବା ଆଇପିଏଲର ୪୩ ତମ ମ୍ୟାଚରେ ହାଇଦ୍ରାବାଦ ଜିତୁଥିବା ମ୍ୟାଚ୍ ହାରି ଯାଇଛି । ଗୋଟିଏ ସମୟ ଏପରି ଥିଲା ଯେତେବେଳେ ପଞ୍ଜାବର ପରାଜୟ ନିଶ୍ଚିତ ଥିଲା । କିନ୍ଟୁ ହଠାତ ବାଜି ପଲଟି ଯାଇଥିଲା । ୧୨୬ ରନର ଟାର୍ଗେଟକୁ ପିଛା କରୁଥିବା ହାଇଦ୍ରାବାଦ ୧୧୪ ରନରେ ଅଟକି ଯାଇଥିଲା ।
ହାଇଦ୍ରାବାଦ ୧୭ ଓଭରରେ ୪ ଓ୍ୱିକେଟ ହରାଇ ୧୦୭ ରନ୍ କରିଥିଲା । ଦଳର ବିଜୟର ଦ୍ୱାରଦେଶରେ ଥିଲା । ବିଜୟୀ ହେବାକୁ ୩ ଓଭରରେ ୨୦ ରନ୍ ଆବଶ୍ୟକ ଥିବା ବେଳେ ଏହାପରେ ଯାହା ହୋଇଥିଲା ତାହା କେହି କଲ୍ପନା କରିନଥିଲେ । ୧୮ ତମ ଓଭରରେ ହେଲମେଟକୁ ନେଇ ଏକ ଅଘଟଣ ହୋଇଥିଲା । ଏହାପରେ ହାଇଦ୍ରାବାଦ ୪ ରନରେ ହିଁ ୬ ଓ୍ୱିକେଟ୍ ହରାଇ ଦେଇଥିଲା ।
୧୮ ଓଭରରେ ପଞ୍ଜାବ ଅଧିନାୟକ କେଏଲ ରାହୁଲ ଅର୍ଶଦୀପ ସିଂଙ୍କୁ ବୋଲିଂ ଦେଇଥିଲେ । କ୍ରିଜରେ ଥିଲେ ବିଜୟ ଶଙ୍କର ଓ ଜେସନ ହୋଲ୍ଡରଙ୍କ ଭଳି ବ୍ୟାଟସମ୍ୟାନ୍ । ଏହି ଓଭରର ପ୍ରଥମ ୩ ବଲରେ ୨ ରନ୍ ବ୍ୟୟ କରିଥିଲେ ଅର୍ଶଦୀପ । ଏହାର ପର ବଲରେ ବିଜୟ ଶଙ୍କର ରନ୍ ନେଉଥିବା ବେଳେ ଫିଲ୍ଡର ବଲ୍ ଥ୍ରୋ କରିଥିଲେ । ବଲ୍ ସିଧା ବିଜୟଙ୍କ ମୁଣ୍ଡରେ ବାଜିଥିଲା । ବିଜୟ ଆହତ ହୋଇଥିଲେ ମଧ୍ୟ ଖେଳ ଜାରି ରଖିଥିଲେ । ଏହାର ପରବର୍ତ୍ତୀ ବଲରେ ସେ କ୍ୟାଚ୍ ଆଉଟ୍ ହୋଇଥିଲେ । ଏହାପରେ ଗୋଟିଏ ପରେ ଗୋଟିଏ ବ୍ୟାଟସମ୍ୟାନ୍ ପ୍ୟାଭିଲିୟନ ଫେରିଥିଲେ ।
