ନିମାପଡା ୩।୮: ମୋରମ ଖଣିକୁ ଯାଉଥିବା ହାଇୱା ଧକ୍କାରେ ୪ଟି ବିଦ୍ୟୁତ ପୋଲ ଭାଙ୍ଗି ପଡିଛି । ଏହା ଗାଁ ପ୍ରତି ବିପଦ ଡାକି ଆଣିଛି । ଏଭଳି ଅଘଟଣ ପୁରୀ ଜିଲ୍ଲା ଡେଲାଙ୍ଗ ବ୍ଲକ୍ ରେଙ୍ଗଲ ପଞ୍ଚାୟତର ଝାରପଡ଼ା ଗ୍ରାମରେ ଘଟିଛି ।
ସୂଚନଯୋଗ୍ୟ ଯେ, ମଙ୍ଗଳବାର ବିଳମ୍ବିତ ରାତିରେ ବେଆଇନ ଖଣିରୁ ମୋରମ ଆଣିବାକୁ ଯାଉଥିବା ଟ୍ରକଟି ଏଭଳି ଦୁର୍ଘଟଣା ଘଟାଇଛି । ଟ୍ରକ୍ ଚାଳକ ଅତି ବେପରୁଆ ଭାବେ ଗାଡ଼ି ଚଳାଇ ଏଭଳି କାଣ୍ଡ ଭିଆଇଛନ୍ତି । ଘରର ଫାଟକ, ପାଣି କଳ ଏବଂ ରାସ୍ତା ମଝିରେ ଖଣ୍ଡ ବିଖଣ୍ଡିତ ହୋଇ ପଡ଼ିରହିଛି ବିଦ୍ୟୁତ ପୋଲ । ତାର ମଧ୍ୟ ସେମିତି ଗାଡ଼ିରେ ଗୁଡ଼େଇ ହୋଇ ରହିଛି । ଯଦି କେହି ବିଦ୍ୟୁତ ତାର ସଂସ୍ପର୍ଶରେ ଆସିଥାନ୍ତେ ତେବେ ନିଶ୍ଚିତ ସେ ପ୍ରାଣ ହରାଇଥାନ୍ତେ । ତେବେ ବେଆଇନ ଖଣିରୁ ଗ୍ରାମ୍ୟ ରାସ୍ତା ଦେଇ ମୋରମ ଚାଲାଣ ଯୋଗୁଁ ଏଭଳି ଦୁର୍ଘଟଣା ଘଟିଥିବା ବେଳେ ସ୍ଥାନୀୟ ଯୁବକ ଏହାକୁ ବିରୋଧ କରି ଗାଁ ରାସ୍ତାରେ ବଡ଼ ଗାଡ଼ି ଯାତାୟତ ନକରିବା ପାଇଁ ପ୍ରଶାସନକୁ ନିବେଦନ କରିଛନ୍ତି ।
