ନୂଆଦିଲ୍ଲୀ ୮।୫: ଭାରତୀୟ ହକି ଦଳର ପୂର୍ବତନ ସଦସ୍ୟ ଏବଂ ମସ୍କୋ ଅଲମ୍ପିକ୍ ୧୯୮୦ର ସ୍ବର୍ଣ୍ଣ ପଦକ ବିଜେତା ରବିନ୍ଦର ପାଲ ସିଂହଙ୍କ ଦେହାନ୍ତ । ପ୍ରାୟ ଦୁଇ ସପ୍ତାହ ଧରି କରୋନା ସଂକ୍ରମିତ ହେବା ପରେ ଶନିବାର ସକାଳେ ଲକ୍ଷ୍ନୌରେ ଶେଷ ନିଶ୍ବାସ ତ୍ୟାଗ କରିଛନ୍ତି । ମୃତ୍ୟୁ ବେଳକୁ ତାଙ୍କୁ ୬୦ବର୍ଷ ବୟସ ହୋଇଥିଲା ।
ରବିନ୍ଦର ପାଲ ସିଂହଙ୍କୁ ଅପ୍ରେଲ ୨୪ ତାରିଖରେ ବିବେକାନନ୍ଦ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପାରିବାରିକ ସୂତ୍ର ଅନୁସାରେ ସେ କରୋନାରୁ ସୁସ୍ଥ ହୋଇଯାଇଥିଲେ । ପରୀକ୍ଷା ରିପୋର୍ଟ ନେଗେଟିଭ୍ ଆସିବା ପରେ କରୋନା ଓ୍ବାର୍ଡରୁ ତାଙ୍କୁ ସ୍ଥାନାନ୍ତର କରାଯାଇଥିଲା । ଶୁକ୍ରବାର ଦିନ ହଠାତ ତାଙ୍କ ସ୍ବାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଭେଣ୍ଟିଲେଟରରେ ରଖିବାକୁ ପଡିଥିଲା ।
ଲସ୍ ଆଞ୍ଜେଲସ୍ ଅଲମ୍ପିକ୍ ୧୯୮୪ ଖେଳିଥିବା ରବିନ୍ଦର ପାଲ ସିଂହ ବିବାହ କରିନଥିଲେ । ସେ ୧୯୭୯ ଜୁନିଅର ବିଶ୍ବକପ୍ ଖେଳିଥିଲେ । ହକି ଖେଳ ଛାଡିବା ପରେ ଷ୍ଟେଟ ବ୍ୟାଙ୍କରୁ ସ୍ବେଚ୍ଛାକୃତ ଅବସର ନେଇଥିଲେ । ସୀତାପୁରରେ ଜନ୍ମ ଗ୍ରହଣ କରିଥିବା ରବିନ୍ଦର ପାଲ ସିଂହ ୧୯୭୯ରୁ ୧୯୮୪ ମଧ୍ୟରେ ଚମତ୍କାର ପ୍ରଦର୍ଶନ କରିଥିଲେ । ଦୁଇଟି ଅଲମ୍ପିକ୍ ବ୍ୟତୀତ ସେ ୧୯୮୦ ଏବଂ ୧୯୮୩ରେ ଚାମ୍ପିଅନ୍ସ ଟ୍ରଫି, ୧୯୮୨ରେ ବିଶ୍ବକପ୍ ଏବଂ ୧୯୮୨ ଏସିଆ କପ୍ ମଧ୍ୟ ଖେଳିଥିଲେ ।
