ଆଠଗଡ଼ ୧୩।୦୪ : ଅଶୋକାଷ୍ଟମୀରୁ ଆରମ୍ଭ ହୋଇଥିବା ବାସନ୍ତୀ ଦୁର୍ଗା ପୂଜା ଶେଷ ହୋଇଛି । ଦୁଇ ବର୍ଷର କରୋନା କଟକଣା ପରେ ଚଳିତ ବର୍ଷ ଆରମ୍ଭ ହୋଇଛି କଟକ ଜିଲ୍ଲା ଆଠଗଡ଼ ବ୍ଲକ ଗୁରୁଡ଼ିଝାଟିଆ ପଞ୍ଚାୟତର ୭୬ତମ ବାସନ୍ତୀ ଦର୍ଗାପୂଜା ଯାତ୍ରା । ମାଙ୍କ ପାଖରେ କଳସ ଯାତ୍ରାଠୁ ଆରମ୍ଭ ହୋଇ ବିଶ୍ଵଶାନ୍ତି ମହାଯଜ୍ଞ ଅନୁଷ୍ଠିତ ହୋଇଛି । ରୀତିନୀତି ଅନୁସାରେ ପୂଜାର୍ଚ୍ଚନା ପରେ ମାଙ୍କ ଭସାଣି ଯାତ୍ରା ଦେଖିବାକୁ ଶ୍ରଦ୍ଧାଳୁଙ୍କ ସୁଅ ଛୁଟୁଛି ।
ତେବେ ଘଣ୍ଟଘଣ୍ଟା ସାଙ୍ଗକୁ ନାମ ସଂକୀର୍ତନରେ ପ୍ରକମ୍ପିତ ପୁରା ପରିଵେଶ । ବହୁ ଦୂରରୁ ଆସିଥିବା ଶ୍ରଦ୍ଧାଳୁମାନେ ନୁଆ ଲୁଗାକୁ ରାସ୍ତା ଉପରେ ପକେଇ ଥାଆନ୍ତି । ସେହି ଲୁଗା ଉପରେ ଦେଇ ଭକ୍ତଙ୍କ କାନ୍ଧରେ ଆସିଥାନ୍ତି ମାଙ୍କ ମୃମୟୀ ମୃତ୍ତି । ବିଶ୍ବାସ ରହିଛି ସେଇ ଲୁଗା ପରିଧାନ କଲେ ପରିବାର ଶାନ୍ତିରେ ରହିବା ସହିତ କୋଟି ଜନ୍ମର ପୂଣ୍ୟ ମିଳିଥାଏ ।
ଗୁରୁଡିଝାଟିଆ ବାସନ୍ତୀ ଦର୍ଗାପୂଜା ଯାତ୍ରାର ରହିଛି ଅନେକ ଖ୍ୟାତି ରହିଛି । ମା ହେଉଛନ୍ତି ସାକ୍ଷାତ ଅଗ୍ନିଦେବୀ । ଭକ୍ତିର ସହ ମାଙ୍କୁ ଆରାଧନା କଲେ ମନୋବାଞ୍ଛା ପୂର୍ଣ୍ଣ ହୁଏ ବୋଲି ବିଶ୍ୱାସ ରହିଛି ।
କରୋନା କଟକଣା କୋହଳ ହେବା ପରେ ଚଳିତ ବର୍ଷ ଧୁମଧାମ ରେ ବାସନ୍ତୀ ଦୁର୍ଗା ଯାତ୍ରା ଆରମ୍ଭ ହୋଇଛି । ଚଳିତ ବର୍ଷ ଆନୁଷ୍ଠାନିକ ଭାବେ ପାଳିତ ହୋଇଯାଇଛି ମା ବାସନ୍ତୀ ଦୁର୍ଗା ପୂଜାର ଭସାଣୀ ପର୍ବ ।
୫ ଦିନ ଧରି ଅନୁଷ୍ଠିତ ହୋଇଯାଇଥିବା ଏହି ପାରମ୍ପରିକ ଯାତ୍ରା ସ୍ଵାଧୀନତା ପୂର୍ବରୁ ଚାଲିଆସୁଛି । ପୁଣି ଅପେକ୍ଷା ଆରବରଷକୁ, ଏହି ଆଶିଷ ମାଗି ମାଙ୍କୁ ବିଦାୟ ଦେଇଛନ୍ତି ଅଞ୍ଚଳବାସୀ ।
