ନୂଆଦିଲ୍ଲୀ ୧୦/୦୩: ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ପରଠାରୁ ତାଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀଙ୍କ ବଲିଉଡ କ୍ୟାରିୟର ତଳକୁ ଖସିଖସି ଯାଉଛି । ଏହାର ପ୍ରଭାବ ପୁଣି ଥରେ ସାମ୍ନାକୁ ଆସିଛି, ଯାହା ଅଭିନେତା ଇମ୍ରାନ ହାଶମୀଙ୍କ ଏକ ପୋଷ୍ଟ ପରେ ଚର୍ଚ୍ଚା ହେଉଛି । ବାସ୍ତବରେ ଫିଲ୍ମ ‘ଚେହରେ’ର ଆଉ ଏକ ପୋଷ୍ଟର ସାମ୍ନାକୁ ଆସିଛି, ଯାହାକୁ ମୁଖ୍ୟ ଭୂମିକାରେ ନଜର ଆସିଥିବା ଇମ୍ରାନ୍ ହାଶମୀ ନିଜ ଟ୍ୱିଟର୍ ଆକାଉଣ୍ଟରେ ସେୟାର କରିଛନ୍ତି । ଯେଉଁଥିରେ ପୁଣିଥରେ ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ଚେହେରା ଆଉ ନାମ ଦୁଇଟିଯାକ ନାହିଁ । ପୋଷ୍ଟରରେ ଇମ୍ରାନ୍ ହାଶମୀ ଏବଂ ଅମିତାଭ ବଚ୍ଚନଙ୍କୁ ଆଗରେ ଦେଖିବାକୁ ମିଳିଥିବାବେଳେ ଟିଭି ଅଭିନେତ୍ରୀ କ୍ରିଷ୍ଟଲ୍ ଡିସୁଜା ମଧ୍ୟ ପଛରେ ନଜର ଆସୁଛନ୍ତି । ଏହି ପୋଷ୍ଟରକୁ ବିଗ୍ ବି ତାଙ୍କ ସୋସିଆଲ ମିଡିଆ ଆକାଉଣ୍ଟରେ ମଧ୍ୟ ସେୟାର କରିଛନ୍ତି ।
ଦୁଇ ବର୍ଷ ପୂର୍ବେ ରୁମି ଜାଫରୀଙ୍କ ନିର୍ଦ୍ଦେଶିତ ଫିଲ୍ମ ‘ଚେହରେ’ରେ ରିୟା ଚକ୍ରବର୍ତ୍ତୀ ଅଭିନୟ କରିବେ ବୋଲି ଚର୍ଚ୍ଚା ହେଉଥିଲା । ରିୟା ନିଜ ଇନଷ୍ଟାଗ୍ରାମ୍ ଆକାଉଣ୍ଟ ମାଧ୍ୟମରେ ମଧ୍ୟ ଜଣାଇଥିଲେ । ସେ ଏହାର ସୂଚନା ଫ୍ୟାନ୍ସମାନଙ୍କ ସହ ବାଣ୍ଟିଥିଲେ ଏବଂ କହିଥିଲେ ସେ ଏହି ଫିଲ୍ମର ଏକ ଅଂଶ ହେବେ । ଏଥିସହିତ ସେ ଟ୍ୱିଟରେ ସମସ୍ତଙ୍କୁ ଟ୍ୟାଗ୍ ମଧ୍ୟ କରିଥିଲେ । କିନ୍ତୁ ଏହା ମଧ୍ୟରେ ସୁଶାନ୍ତ ସିଂ ରାଜପୁତ ଆତ୍ମହତ୍ୟା କରିଥିଲେ ଏବଂ ଏହି ମାମଲାରେ ରିୟା ଚକ୍ରବର୍ତ୍ତୀ ସମ୍ପୂର୍ଣ୍ଣ ଭାବରେ ଫସି ଯାଇଥିଲେ ।
ପୂର୍ବରୁ ଅମିତାଭ ବଚ୍ଚନ ଫିଲ୍ମ ‘ଚେହରେ’ରଏକ ପୋଷ୍ଟର ସେୟାର କରିଥିଲେ। ରିୟା ଚକ୍ରବର୍ତ୍ତୀ ମଧ୍ୟ ଏଥିରେ ଦେଖା ଯାଇନଥିଲେ । କୁହାଯାଉଛି ଯେ ରିୟାଙ୍କୁ ଫିଲ୍ମରୁ ବାହାର କରି ଦିଆଯାଇଛି । ଏହି ଖବର ପାଇବା ମାତ୍ରେ ସୋସିଆଲ ମିଡିଆରେ ରିୟାଙ୍କୁ ଟ୍ରୋଲ୍ କରାଯାଇଥିଲା । ବିଗ୍ ବିଙ୍କ ଦ୍ୱାରା ସେୟାର ହୋଇଥିବା ପୋଷ୍ଟରରେ ଲୋକମାନେ ବିଭିନ୍ନ ପ୍ରତିକ୍ରିୟା ଦେଇଥିଲେ । କେହି କେହି ଲେଖିଛନ୍ତି, ରିୟାଙ୍କୁ ଫିଲ୍ମରୁ ବାହାର କରାଯାଇଛି, ତ ଆଉ କେହି ଲେଖିଛନ୍ତି ଯଦି ରିୟା ଚକ୍ରବର୍ତ୍ତୀଙ୍କୁ ତାଙ୍କ ଫିଲ୍ମରେ ନିଅନ୍ତି ତେବେ ଏହା ଏକ ସୁପରଫ୍ଲପ୍ ଫିଲ୍ମ ହେବ ।
ଫିଲ୍ମ ‘ଚେହରେ’ ଏହି ବର୍ଷ ୩୦ ଏପ୍ରିଲ୍ ରେ ରିଲିଜ୍ ହେବ । ୧୧ ମାର୍ଚ୍ଚ ଗୁରୁବାର ଦିନ ଏହାର ଟିଜର୍ ରିଲିଜ୍ ହେବ । ଏହାକୁ ସେୟାର କରି ଇମ୍ରାନ୍ ହାଶମୀ ଲେଖିଛନ୍ତି, ‘କିଛି ଚେହେରା, ହଜାରେ ରହସ୍ୟ, ପ୍ରତ୍ୟେକ ଚେହେରା କିଛି କହିଥାଏ ଏବଂ ଅନେକ କିଛି ଲୁଚାଇଥାଏ ।‘
