ନବରଙ୍ଗପୁର ୧୨।୦୫: ରାସ୍ତା ମଝିରେ ଓଲଟିଲା ବିଦେଶୀ ମଦ ବୋଝେଇ ଗାଡି । ଦୁର୍ଘଟଣାଗ୍ରସ୍ତ ଗାଡିରୁ ପେଟେ ପେଟି ମଦ ବୋହିନେଲେ ଲୋକେ। ନବରଙ୍ଗପୁର ଜିଲ୍ଲା କୋଷାଗୁମୁଡା ବ୍ଲକ ଛେଳିପଦର ମୁଖ୍ୟ ରାସ୍ତାରେ ଦେଖିବାକୁ ମିଳିଛି ଏପରି କିଛି ଦୃଶ୍ୟ । ଭାରସାମ୍ୟ ହରାଇ ଗାଡିଟି ଦୁର୍ଘଟଣା ହେବ ପରେ ଏପରି ଦେଖିବାକୁ ମିଳିଥିଲା ।
ଖବର ଅନୁଯାୟୀ, କୋଷାଗୁମୁଡା ବ୍ଲକ ସନ୍ତୋଷପୁରରେ ଥିବା ବିଦେଶୀ ମଦ ଭାଟିକୁ ବିୟର ନେଇ ଆସୁଥିବା ଗାଡି ଛେଳିପଦର ଗାଁ ନିକଟରେ ଭାରସାମ୍ୟ ହରାଇ ଗାଡିଟି ଓଲଟି ପଡିଥିଲା । ଗାଡ଼ିରେ ଥିବା ପେଟି ପେଟି ବିୟର ମଦ ବୋତଲ ଭାଙ୍ଗି ରାସ୍ତାରେ ଭାସିଥିଲା । କିଛି ସମୟ ପାଇଁ ରାସ୍ତାରେ ମଦର ବନ୍ୟା ଦେଖିବାକୁ ମିଳିଥିଲା । ଏହା ଜାଣିବା ପରେ ସ୍ଥାନୀୟଲୋକେ ଦୁର୍ଘଟଣା ଘଟିଥିବା ସ୍ଥାନରେ ପହଞ୍ଚି ବିୟର ପେଟି ଟେକି ନେଇଥିଲେ ।
ସେପଟେ ଦୁର୍ଘଟଣା ସଂପର୍କରେ ଖବର ପାଇଁ ସନ୍ତୋଷପୁର ବିଦେଶୀ ମଦ ଦୋକାନର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ବଳିଥିବା ମଦ ବୋତଲ ଗୋଟାଇ ନିଜ ଗାଡ଼ିରେ ଦୋକାନକୁ ନେଇଥିବାର ଦେଖିବାକୁ ମିଳିଥିଲା । ଅନ୍ୟପଟେ ଏହି ଖବର ପାଇ କୋଷାଗୁମୁଡା ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ଗାଡିକୁ ଜବତ କରି ତଦନ୍ତ ଆରମ୍ଭ କରିଥିବା ସୂଚନା ମିଳିଛି ।
