ଅହମଦାବାଦ: ଅତୀତରେ ଝିଅମାନେ ୧୪/୧୫ ବର୍ଷ ବୟସରେ ବିବାହ କରୁଥିଲେ ଓ ୧୭ ବର୍ଷ ବେଳକୁ ମାତୃତ୍ବପ୍ରାପ୍ତି କରୁଥିଲେ ବୋଲି ଗୁରୁବାର ଦିନ ଜଣେ ନାବାଳିକାର ଗର୍ଭପାତ ଆବେଦନ ଶୁଣାଣି ବେଳେ ମୌଖିକ ଭାବେ ଗୁଜରାଟ ହାଇକୋର୍ଟ କହିଛନ୍ତି।
ସୂଚନାଯୋଗ୍ୟ, ୭ ମାସର ଗର୍ଭନଷ୍ଟ କରାଇବାକୁ ଚାହୁଁଥିବା ଉକ୍ତ ୧୭ ବର୍ଷୀୟ ଝିଅ ହେଉଛନ୍ତି ଜଣେ ଦୁଷ୍କର୍ମ ପୀଡ଼ିତା। ୭ ମାସ ବିତିଯିବା ପରେ ସେ ଅନ୍ତଃସତ୍ତ୍ବା ବୋଲି ତାଙ୍କ ବାପା ଜାଣିବାକୁ ପାଇଲେ। ଝିଅର ବୟସ ପ୍ରତି ଦୃଷ୍ଟି ଦେଇ ଡାକ୍ତରଖାନାରେ ଗର୍ଭସ୍ଥ ଭ୍ରୂଣ ନଷ୍ଟ କରାଇବା ଲାଗି ବାପା ଅଦାଲତରେ ଆବେଦନ କରିଥିଲେ।
ଗର୍ଭନଷ୍ଟ ପ୍ରତି ଓକିଲ ଜୋର୍ ଦେବାରୁ ବିଚାରପତି ସମୀର ଜେ. ଦାୱେ କହିଲେ, ପ୍ରାଚୀନ କାଳରେ ୧୪/୧୫ ବର୍ଷରେ ବିବାହ କରିବା ଝିଅମାନଙ୍କ ପାଇଁ ଥିଲା ସ୍ବାଭାବିକ ଘଟଣା। ୧୭ ବର୍ଷ ପୂର୍ବରୁ ମଧ୍ୟ ସେମାନେ ମାଆ ହେଉଥିଲେ। ଆପଣ ଏକଥା ପଢ଼ି ନ ଥିବେ। ତେଣୁ, ଏଥିପାଇଁ ଥରେ ‘ମନୁସ୍ମୃତି’ ପଢ଼ନ୍ତୁ।
ଉକ୍ତ ନାବାଳିକାର ସମ୍ଭାବ୍ୟ ପ୍ରସବ ତାରିଖ ଅଗଷ୍ଟ ୧୮ ତାରିଖ ବୋଲି ଡାକ୍ତରମାନେ କହିଥିବାରୁ ଗର୍ଭପାତ ମାମଲାର ତ୍ବରିତ ଶୁଣାଣି ପାଇଁ ବରିଷ୍ଠ ଆଡ୍ଭୋକେଟ୍ ସିକନ୍ଦର ସୟେଦ୍ ଅଦାଲତଙ୍କ ନିକଟରେ ଆବେଦନ କରିଥିଲେ। କିନ୍ତୁ, ଅଦାଲତ କହିଲେ ଯେ, ଯଦି ଭ୍ରୂଣ ଓ ଝିଅର ଅବସ୍ଥା ଭଲ ଥିବ, ତେବେ ଗର୍ଭପାତ ପାଇଁ ଅନୁମତି ମିଳିବ ନାହିଁ।
ଜରୁରୀଭିତ୍ତିରେ ସିଭିଲ୍ ହସ୍ପିଟାଲ୍ର ଦଳେ ଡାକ୍ତରଙ୍କଦ୍ବାରା ଏହି ନାବାଳିକାର ଡାକ୍ତରୀ ପରୀକ୍ଷା କରାଇବା ନିମନ୍ତେ ଅଦାଲତ ରାଜକୋଟ୍ ସିଭିଲ୍ ହସ୍ପିଟାଲ୍ର ମେଡିକାଲ୍ ସୁପରିଣ୍ଟେଣ୍ଡେଣ୍ଟ୍ଙ୍କୁ ଆଦେଶ ଦେଇଛନ୍ତି।
ଡାକ୍ତରୀ ରିପୋର୍ଟକୁ ଆଧାର କରି ଅଦାଲତ ଯାହାକିଛି ନିଷ୍ପତ୍ତି ନେବେ। ତେଣୁ, ଜୁନ୍ ୧୫ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ଅଦାଲତ ଦିନ ଧାର୍ଯ୍ୟ କରିଛନ୍ତି।
