ଭଦ୍ରକ ୯।୧୧: ମଞ୍ଚ ଫେରାଇବା ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବସିଲେ ଶତାଧିକ କଳାକାର । ଶୋଭାଯାତ୍ରାରେ ଆସି ଜିଲ୍ଲାପାଳଙ୍କୁ ନିଜ ଦାବି ଜଣାଇଛନ୍ତି । ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବସିଛନ୍ତି ଶତାଧିକ କଳାକାର ।
ସୂଚନାଯୋଗ୍ୟ ଯେ, କରୋନା କଟକଣା ପାଇଁ ଜିଲ୍ଲାର ହଜାର ହଜାର କଳାକାର ଏବେ ହାତ ବାନ୍ଧି ବସିଛନ୍ତି । ମେଲୋଡି, ଅର୍କେଷ୍ଟ୍ରା, କଳାକାର, କଣ୍ଠଶିଳ୍ପୀ ଓ ଡ୍ୟାନ୍ସ ଗ୍ରୁପର ମାଲିକ ଓ କଳାକାରମାନେ ଏବେ ନିଜର ଦାବି ଉପସ୍ଥାପନ କରିଛନ୍ତି । ପୂର୍ବରୁ ଭିନ୍ନ ଭିନ୍ନ ମାଧ୍ୟମରେ ନିଜ ଦାବି ପୂରଣ ପାଇଁ ଜିଲ୍ଲା ପ୍ରଶାସନଠାରୁ ଆରମ୍ଭ କରି ମୁଖ୍ୟମନ୍ତ୍ରୀଙ୍କୁ ନିବେଦନ କରିଥିଲେ ।
ତେବେ ସୋମବର ଶତାଧିକ କଳାକାର ଓ ମାଲିକ ବନ୍ତ ଛକଠାରୁ ଏକ ଶୋଭାଯାତ୍ରାରେ ବାହାରି ଜିଲ୍ଲାପାଳଙ୍କ କାର୍ଯ୍ୟାଳୟ ଗେଟ୍ ସମ୍ମୁଖରେ ବସିଛନ୍ତି । ଆଗାମୀ ଦିନରେ କରୋନା କଟକଣା ମଧ୍ୟରେ ମଞ୍ଚ ଫେରାଇବା ପାଇଁ ଦାବି କରିଛନ୍ତି । ପର୍ବ ପର୍ବାଣୀରେ କରୋନା କଟକଣା ମଧ୍ୟରେ କାର୍ଯ୍ୟକ୍ରମ କରିବା ପାଇଁ ଅନୁରୋଧ କରିଛନ୍ତି । ଦାବି ପୂରଣ ନହେଲେ ଆଗାମୀ ଦିନରେ ନବୀନ ନିବାସ ଘେରାଉ ପାଇଁ ମଧ୍ୟ ଚେତାବନୀ ଦେଇଛନ୍ତି ।
