ଭୁବନେଶ୍ୱର: ଭୁବନେଶ୍ୱରରେ ପ୍ରସ୍ତୁତ ହେବ କୋଭିଡ୍ ଟିକା । ଭାରତ ବାୟୋଟେକ୍ ପକ୍ଷରୁ ପ୍ରତିଷ୍ଠା ହେବ ଇନକ୍ୟୁବେଟର ସେଣ୍ଟର । ଅନ୍ଧାରୁଆ ବାୟୋଟେକ୍ ପାର୍କରେ ପ୍ରତିଷ୍ଠା ହେବ ଏହି କାରଖାନା । ଏଥିପାଇଁ ୩ଶହ କୋଟି ଟଙ୍କାର ପୁଞ୍ଜି ନିବେଶ କରିବ ଭାରତ ବାୟୋଟେକ । ଏଠାରେ ମ୍ୟାଲେରିଆ, ଜାପାନୀ ଏନସେଫାଲାଇଟିସ୍ ଟିକା ମଧ୍ୟ ପ୍ରସ୍ତୁତ ହେବ । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏପରି ଏକ ପ୍ରକଳ୍ପ ମଞ୍ଜୁରୀ ମିଳିଛି । ୧୫ ଦିନ ମଧ୍ୟରେ ଏହି କମ୍ପାନିର ନିର୍ମାଣ କାର୍ଯ୍ୟ ଆରମ୍ଭ ହେବ । ଆଜି ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଲୋକସେବା ଭବନ ପରିସରରେ ଏହି ବୈଠକ ଅନୁଷ୍ଠିତ ହୋଇଥିଲା ।
ବିଜ୍ଞାନ ପ୍ରଯୁକ୍ତି ବିଦ୍ୟାର ପ୍ରମୁଖ ସଚିବ ସନ୍ତୋଷ କୁମାର ଷଡଙ୍ଗୀ ଏନେଇ ସୂଚନା ପ୍ରଦାନ କରିଥିଲେ । ଏହି ପ୍ରକଳ୍ପ ପାଇଁ ରାଜ୍ୟ ସରକାରଙ୍କ ପକ୍ଷରୁ ଜମି ଓ ଆବଶ୍ୟକୀୟ ସାହାଯ୍ୟ ଯୋଗାଇ ଦିଆଯିବ ବୋଲି କୁହାଯାଇଛି । ଏଥିପାଇଁ ପ୍ରଦୂଷଣ ବୋର୍ଡ ପକ୍ଷରୁ କ୍ଲିଅରାନ୍ସ ମିଳିବା ପରେ କମ୍ପାନିର ନିର୍ମାଣ କାର୍ଯ୍ୟ ଖୁବଶୀଘ୍ର ଆରମ୍ଭ ହେବ ବୋଲି କୁହାଯାଇଛି । କୋଭିଡ ସହ ମ୍ୟାଲେରିଆ ଭ୍ୟାକସିନ୍ ମଧ୍ୟ ଏହିଠାରେ ପ୍ରସ୍ତୁତ କରାଯିବ ।
