ବାଲିପାଟଣା ୨୦।୭: ବେଆଇନ କରତ କଳ ଉପରେ ଚଢାଉ । ବାଲିପାଟଣା ବନାଞ୍ଚଳ ଅନ୍ତର୍ଗତ ଧାନହରା ଏବଂ ଚଣାହଟ୍ଟା କରତକଳ ଉପରେ ଏକକାଳୀନ ଚଢାଉ କରିଛି ବନ ବିଭାଗ । ଚଢାଉରେ ଲକ୍ଷାଧିକ ଟଙ୍କାର କରତ କଳ ଯନ୍ତ୍ରାଶଂ ଏବଂ ବହୁ ଦାମୀ କାଠ ଜବତ କରିଛି ଫରେଷ୍ଟ ଭିଜିଲାନ୍ସ ।
ଦୀର୍ଘ ଦିନ ଧରି ଏହି ବେଆଇନ କରତ କଳ ଚାଲୁଥିଲା । ଅଭିଯୋଗ ପରେ ବୁଧବାର ସକାଳୁ ଚଢାଉ କରାଯାଇଛି । ଗ୍ୟାସ୍ କଟର ସହାୟତାରେ କରତ କଳ ମଟର, ଲୁହା ଫ୍ରେମ୍କୁ କଟାଯାଇଛି । କରତ କଳରେ ବ୍ୟବହୃତ ଟ୍ରାକ୍ଟରକୁ ମଧ୍ୟ ଜବତ କରାଯାଇଛି । କରତ କଳକୁ ଚିରା ହେବାକୁ ଆସିଥିବା ଶାଗୁଆନ, ଜାମୁ, ଆକାଶୀ ଆଦି କାଠକୁ ଜବତ କରାଯାଇଛି । ସୁରକ୍ଷା ଦୃଷ୍ଟିରୁ ୧ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି । ବେଆଇନ କରତ କଳ ଚଳାଇବା ଅଭିଯୋଗରେ ଧାନହରା କରତ କଳର କୃଷ୍ଣ ଚନ୍ଦ୍ର ପୃଷ୍ଟି ଏବଂ ଚଣାହଟ୍ଟା କରତ କଳର ଜୀତେନ୍ଦ୍ର ମହାନ୍ତିଙ୍କ ନାମରେ ମାମଲା ରୁଜୁ ହେବ ବୋଲି ଫରେଷ୍ଟ ଭିଜିଲାନ୍ସ ଅଧିକାରୀ ସୂଚନା ଦେଇଛନ୍ତି ।
