ନୂଆଦିଲ୍ଲୀ, ୦୧।୦୪ : ଆଇପିଏଲ ୨୦୨୨ରେ ଗୁରୁବାର ଚେନ୍ନାଇ ସୁପର କିଙ୍ଗସ ଓ ଲକ୍ଷ୍ନୌ ସୁପର ଜିଆଣ୍ଟସ୍ ମଧ୍ୟରେ ଖେଳାଯାଇଥିବା ହାଇସ୍କୋରିଂ ମୁକାବିଲା । ମ୍ୟାଚରେ ଲକ୍ଷ୍ନୌ ୬ ଓ୍ୱିକେଟରେ ଚେନ୍ନାଇକୁ ପରାସ୍ତ କରିଥିଲା । ଏହା ଚଳିତ ସିଜିନରେ ଲକ୍ଷ୍ନୌର ପ୍ରଥମ ବିଜୟ ।
ରୋମାଞ୍ଚକର ମୁକାବିଲା
ମ୍ୟାଚରେ ଲକ୍ଷ୍ନୌ ଟିମକୁ ଜିତିବାକୁ ଶେଷ ୧୨ ବଲରେ ୩୪ ରନ୍ ଦରକାର ଥିଲା । ଚେନ୍ନାଇ ଅଧିନାୟକ ରବୀନ୍ଦ୍ର ଜାଡେଜା ୧୯ତମ ଓଭର ବୋଲିଂ କରିବାକୁ ଶିବମ ଦୁବେଙ୍କୁ ଦେଇଥିଲେ । କ୍ରିଜରେ ଥିବା ଆୟୁଷ ବଦୋନୀ ଶିବମଙ୍କ ବଲକୁ ସ୍ୱିପ୍ ସଟ୍ ଖେଳି ଏକ ଲମ୍ବା ଛକ୍କା ମାରିଥିଲେ ।
ମହିଳାଙ୍କ ମୁଣ୍ଡରେ ବାଜିଲା ବଲ୍
ଆୟୁଷ ଯେଉଁ ସଟ୍ ଖେଳିଥିଲେ ତାହା ପ୍ୟାଭିଲିୟନରେ ଥିବା ଜଣେ ମହିଳାଙ୍କ ମୁଣ୍ଡରେ ବାଜିଥିଲା । କମେଣ୍ଟେଟର୍ସ ମଧ୍ୟ ମହିଳାଙ୍କୁ ବେଶୀ ଆଘାତ ଲାଗିନଥିବା କହିଥିଲେ । ତେବେ ଏହି ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି ।
ସୂଚନାଯୋଗ୍ୟ, ପ୍ରଥମେ ବ୍ୟାଟିଂ କରି ୨୧୦ ରନ୍ କରିଥିଲା ଚେନ୍ନାଇ । ଜବାବରେ ଲକ୍ଷ୍ନୌ ଅଧିନାୟକ କେଏଲ ରାହୁଲ ଓ କ୍ୱିଣ୍ଟନ୍ ଡିକକଙ୍କ ବ୍ୟାଟିଂ ବଳରେ ମଜବୁତ ଆରମ୍ଭ କରିଥିଲା । ଉଭୟ ଓପନିଂ ଯୋଡିରେ ୬୨ ବଲରୁ ୯୯ ରନ୍ କରିଥିଲେ । ଶେଷ ୧୩ ବଲରେ ଡେଭିନ୍ ଲୁଇସ୍ ଓ ଆୟୁଷ ବଦୋନୀ ୪୦ ରନ୍ କରି ଦଳକୁ ବିଜୟୀ କରାଇଥିଲେ ।
