ଜଳେଶ୍ୱର, ୨୫/୧୨: ଡଗରା ବେଳାଭୂମିର ପ୍ରାକୃତିକ ସୌନ୍ଦର୍ଯ୍ୟ ଓ ନାଲି କଙ୍କଡା ପର୍ଯ୍ୟଟକଙ୍କୁ ଆକ୍ରୁଷ୍ଟ କରିଥାଏ । କିନ୍ତୁ ବିକାଶ ଅଭାବରୁ ପର୍ଯ୍ୟଟକ ଏଠାକୁ ଆସିବାକୁ ନାରାଜ । ବିସ୍ତୀର୍ଣ୍ଣ ସବୁଜ ଝାଉଁ ଜଙ୍ଗଲ ଶୋଭା ସହିତ ନାଲି କଙ୍କଡାର ଲୁଚକାଲି ଖେଳ ଏବଂ ସୁବିସ୍ତୀର୍ଣ୍ଣ ସମୁଦ୍ର ବେଳାଭୂମିର ରମଣୀୟ ଦୃଶ୍ୟକୁ ଉପଭୋଗ କରିବା ପାଇଁ ଏଠାକୁ ବର୍ଷକ ଯାକ ପର୍ଯ୍ୟଟକମନଙ୍କର ସୁଅ ଛୁଟିଥାଏ । ତେବେ ବିକାଶ ଠପ୍ ଥିବାରୁ ପର୍ଯ୍ୟଟକ ମୁହଁ ଏଠାରୁ ଫେରାଇ ନେଉଛନ୍ତି ।
ବାଲେଶ୍ୱର ଜିଲ୍ଲାର ବାଲିଆପାଳମାଟିକୁ ଧରଣୀ ରାଣୀ ଦେଇଛି ଅପରୂପ ସୌନ୍ଦର୍ଯ୍ୟ । ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଡଗରା ବେଳାଭୂମି । ବିସ୍ତୀର୍ଣ୍ଣ ସବୁଜ ଝାଉଁ ଜଙ୍ଗଲର ସୁ ସୁ ଶବ୍ଦରେ ପର୍ଯଟକମାନେ ବିମୋହିତ ହୋଇଯାନ୍ତି । ଉଦିତମାନ ସୁର୍ଯ୍ୟର ଆକର୍ଷଣୀୟ ସୌନ୍ଦର୍ଯ୍ୟ ସହିତ ବେଳାଭୂମିରେ ଥିବା ନାଲି କଙ୍କଡ଼ାର ଲୁଚକାଳି ଖେଳର ଦୃଶ୍ୟ ଅତ୍ୟନ୍ତ ମନୋରମ । ବେଳାଭୂମିରେ ସମତଳ ଭୂମି ହୋଇ ଥିବାରୁ ପର୍ଯ୍ୟଟକମାନଙ୍କୁ ଅଧିକ ଆକର୍ଷଣ କରିଥାଏ । ପର୍ଯ୍ୟଟକମାନେ ବେଳାଭୂମିକୁ ଆସି ଝାଉଁ ଜଙ୍ଗଲରେ ବଣଭୋଜି କରିବା ସହିତ ସେଲ୍ଫି ନେଇ ଏହାର ମଜା ଉଠାଇଥାନ୍ତି !
ବେଳାଭୂମିଟି ଓଡିଶାର ସୀମାନ୍ତରେ ରହିଥିବାରୁ ଓଡିଶା ସମେତ ପଡୋଶୀ ପଶ୍ଚିମବଙ୍ଗ. ଝାଡ଼ଖଣ୍ଡ. ବିହାରରୁ ମଧ୍ୟ ପର୍ଯ୍ୟଟକ ମାନେ ଏହାର ସୌନ୍ଦର୍ଯ୍ୟ ଉପଭୋଗ କରିବାପାଇଁ ଛୁଟି ଆସିଥାନ୍ତି । ମାତ୍ର ଏହି ବେଳାଭୂମିର ବିକାଶ ଦିଗରେ ସରକାରୀ ସ୍ତରରେ ପ୍ରୟାସ କରାଯାଇ ନ ଥିବାରୁ ପର୍ଯ୍ୟଟକ ମହଲରେ ଅସନ୍ତୋଷ ଦେଖା ଦେଇଛି ।
୨୦୧୬ମସିହା ଜାନୁଆରୀ ୨୯ ତାରିଖରେ ମାନ୍ୟବର ମୁଖ୍ୟମନ୍ତ୍ରୀ ଏହି ବେଳାଭୂମିରେ ୧କୋଟି ୬୬ଲକ୍ଷ ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ଟୁରିଷ୍ଟ କରିଡର ଓ ପାନ୍ଥ ନିବାସର ଉଦଘାଟନକୁ ୫ବର୍ଷ ବିତି ଯାଇଛି । କିନ୍ତୁ ବେଳାଭୂମିକୁ ଆସିବା ପାଇଁ ଭଲ ରାସ୍ତାଟିଏ ନାହିଁ । ପର୍ଯ୍ୟଟକମାନଙ୍କର ଅତ୍ୟାବଶ୍ୟକ ପିଇବାପାଣି, ବସିବା ପାଇଁ ବେଞ୍ଚ୍ ଏବଂ ସନ୍ଧ୍ୟା ସମୟର ଦୃଶ୍ୟକୁ ଉପଭୋଗ କରିବା ପାଇଁ କୌଣସି ଲାଇଟର ବ୍ୟବସ୍ଥା ନ ଥିବାରୁ ପର୍ଯ୍ୟଟକ ସହିତ ଗ୍ରାମବାସୀମାନେ ଅସନ୍ତୋଷ ପ୍ରକାଶ କରିଛନ୍ତି । ବେଳାଭୂମିର ବିକାଶ ଏବଂ ଉନ୍ନତି ପାଇଁ ସରକାରୀ ସ୍ତରରେ ପଦକ୍ଷେପ ଗ୍ରହଣ କରାଗଲେ, ଏହା ବିଶ୍ୱ ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇବା ସହିତ ଆହୁରି ଅଧିକ ପର୍ଯ୍ୟଟକମାନେ ଏଠାକୁ ଆସିପାରନ୍ତେ ।
