କିବ୍ : ୟୁକ୍ରେନ୍ର ବାଖମୁଟରୁ ରୁଷ୍ ସେନା ପଛଘୁଞ୍ଚା ଦେଇ ପଳାୟନ କରୁଥିବା ବୁଧବାର ୟୁକ୍ରେନ୍ ପକ୍ଷରୁ କୁହାଯାଇଛି। ପୁଟିନଙ୍କ ସେନାର ବାଖମୁଟ ଅଭିଯାନ ଏକ କଷ୍ଟକର ସାମରିକ ଅପରେସନ ବୋଲି କ୍ରେମ୍ଲିନ ସ୍ବୀକାର କରିଥିବା ୟୁକ୍ରେନ୍ କହିଛି।
ୟୁକ୍ରେନ୍ର ଏକ ୟୁନିଟ୍ର ଦାବି ଅନୁସାରେ, ଶୀତଋତୁରେ ବାଖମୁଟରେ ଜୋରଦାର ଆକ୍ରମଣ କରିଥିବା ରୁଷ୍ ସେନା ସେଠାରୁ ଏବେ ପଛଘୁଞ୍ଚା ଦେବାରେ ଲାଗିଛି। ସେମାନେ ପୂର୍ବରୁ ଦଖଲ କରିଥିବା ଅଞ୍ଚଳ ଛାଡ଼ି ପଳାଉଛନ୍ତି। ୟୁକ୍ରେନ୍ର ଜୋରଦାର ପ୍ରତିରୋଧକୁ ସେମାନେ ସମ୍ଭାଳିପାରୁ ନାହାନ୍ତି। ୟୁକ୍ରେନ୍ ସ୍ଥଳସେନାର ମୁଖ୍ୟ କର୍ଣ୍ଣେଲ ଜେନେରାଲ ଓଲେକ୍ଜାଣ୍ଡର ସିରସ୍କାଇ କହିଛନ୍ତି, ବାଖମୁଟର କେତେକ ଅଞ୍ଚଳରୁ ରୁଷ୍ ସେନା ପ୍ରାୟ ଦୁଇ କିଲୋମିଟର ପଛକୁ ହଟିଯାଇଛନ୍ତି। ୟୁକ୍ରେନ୍ର ପ୍ରତିଆକ୍ରମଣ ସେମାନଙ୍କୁ ପଛକୁ ହଟିବାକୁ ବାଧ୍ୟ କରିଛି।
