କାମାକ୍ଷାନଗର ୧୭/୦୯: ଚୋରା ଦେଶି ମଦ ବୋଝେଇ କାର ଧକ୍କାରେ ଭାଇର ମୃତ୍ୟୁ ହେବା ସହିତ ଭଉଣି ଗୁରୁତର। ମୃତକଙ୍କ ପରିଚୟ ବିଦ୍ୟାଧର ରାଉତ। ସେ କାମାକ୍ଷାନଗର ଥାନା ବାଲିପଡା ଗାଁର ବାସିନ୍ଦା। ଗୁରୁତର ଭଉଣିଙ୍କ ଉର୍ମିଳା ରାଉତ ବୋଲି ଜଣାପଡ଼ିଛି। ଉର୍ମିଳାଙ୍କୁ ଗୁରତର ଅବସ୍ଥାରେ କଟକ ବଡ଼ ଡାକ୍ତରଖାନାକୁ ସ୍ଥନାନ୍ତର କରାଯାଇଛି।
କ୍ଷତିପୂରଣ ଦାବିରେ ସ୍ଥାନୀୟ ଲୋକମାନେ ରାସ୍ତାରୋକ କରିଥିଲେ। ଖବର ଅନୁସାରେ, ଶନିବାର ସନ୍ଧ୍ୟାରେ ଏକ ଚୋରା ଦେଶିମଦ ବୋଝେଇ କାରକୁ ପୋଲିସ କାମାକ୍ଷାନଗରରୁ ଜିରାଳ ପର୍ଯ୍ୟନ୍ତ ପିଛା କରିଥିଲା। କାରଟି ଦୃତ ଗତିରେ ଯିବା ବେଳେ ବିପରୀତ ଦିଗରୁ ବାଇକରେ ଆସୁଥିବା ଭାଇ ଭଉଣିଙ୍କୁ ତାରା ତାରିଣୀ ମନ୍ଦିର ପାଖରେ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ଭାଇର ମୃତ୍ୟୁ ହୋଇଥିଲା।
ଉର୍ମିଳାଙ୍କୁ ସ୍ଥାନୀୟ ଲୋକମାନେ ଗୁରୁତର ଅବସ୍ଥାରେ କଟକକୁ ସ୍ଥାନାନ୍ତର କରାଯାଇଛି। ଏପଟେ ସ୍ଥାନୀୟ ଲୋକେ ମୃତକ ପରିବାରକୁ କ୍ଷତିପୁରଣ ଦାବିରେ ରାସ୍ତାରୋକ କରିଥିବା ଦେଖିବାକୁ ମିଳିଥିଲା। ଘଟଣାସ୍ଥଳରେ କାମାକ୍ଷାନଗର ଏସଡିପିଓ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ। ଏହାସହିତ ମୃତକଙ୍କୁ ରେଡକ୍ରସରୁ ସହାୟତା ଦିଆଯିବ ବୋଲି ପୋଲିସ ଅଧିକାରୀ କହିବା ପରେ ରାସ୍ତାରୋକ ହଟିଥିଲା। ପୋଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇ ଏନେଇ ଅଧିକ ତଦନ୍ତ ଚଳାଇଛି।
