ଟାଙ୍ଗୀ ୧୧।୬: ମହଙ୍ଗା ପଡିଲା ପ୍ରେମ ବିବାହ । ବାହାଘରକୁ ବିତିଛି ମାତ୍ର ୩ ମାସ । ନିର୍ଯାତନା ସହି ନପାରି ନବବଧୂ ଜଣକ ଦଉଡି ଦେଇ ଆତ୍ମହତ୍ୟା କରିଛନ୍ତି । ଏପଟେ ଅଧିକ ଯୌତୁକ ପାଇଁ ଶ୍ବଶୁର ଘର ଲୋକେ ନବବଧୂଙ୍କୁ ହତ୍ୟା କରିଛନ୍ତି ବୋଲି ମୃତ ମହିଳାଙ୍କ ବାପଘର ଲୋକେ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୋଲିସ ମୃତା ନବବଧୂଙ୍କ ସ୍ବାମୀଙ୍କୁ ଗିରଫ କରିବା ସହ ମୃତଦେହକୁ ଜବତ କରି ପ୍ରାଥମିକ ତଦନ୍ତ ପରେ ବ୍ୟବଚ୍ଛେଦ ପାଇଁ ପଠାଇଛି ପୋଲିସ ।
ସୂଚନାଯୋଗ୍ୟ ଯେ, ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ମଙ୍ଗଳାଯୋଡି ଗ୍ରାମର ଦୀପକ ବେହେରାଙ୍କ ସହିତ ପୁରୀ ଜିଲ୍ଲା କଣାସ ଥାନା ଅଧିନସ୍ଥ ଅଁଳାଯୋଡି ଗ୍ରାମର ପଞ୍ଚାନନ ରାଉତଙ୍କ ଝିଅଙ୍କର ଫେସବୁକରେ ବନ୍ଧୁତା ହୋଇଥିଲା । ପରେ ଦୁହିଁଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠିଥିଲା । ଉଭୟଙ୍କ ପରିବାର ଲୋକେ ଏହାକୁ ବିରୋଧ କରୁଥିବା ସତ୍ତ୍ବେ ପିଲାଙ୍କ ଖୁସି ପାଇଁ ବୈଦିକ ରୀତିରେ ୩ମାସ ପୂର୍ବେ ଉଭୟଙ୍କ ବିବାହ ହୋଇଥିଲା ।
କିଛି ଦିନ ଭଲରେ ଘର ସଂସାର ଚାଲିଲା ତାପରେ ଆରମ୍ଭ ହୋଇଥିଲା ଯୌତୁକ ନିର୍ଯାତନା । ଯାହାକୁ ନେଇ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବିବାଦ ଆରମ୍ଭ ହୋଇଥିଲା । ଝିଅଘର ଲୋକେ ଯୌତୁକ ମଧ୍ୟ ଦେଲେ ହେଲେ ବିବାଦ କମିଲା ନାହିଁ । ଶୁକ୍ରବାର ବିଳମ୍ବିତ ରାତିରେ ପିଙ୍କି ରଶି ଲଗାଇ ଆତ୍ମହତ୍ୟା କରିଛନ୍ତି । କିନ୍ତୁ ଯୌତୁକ ପାଇଁ ସ୍ବାମୀ କାହ୍ନା ଏବଂ ତାଙ୍କର ପରିବାର ଲୋକେ ଚକ୍ରାନ୍ତ କରି ତାଙ୍କ ଝିଅକୁ ହତ୍ୟା କରିଛନ୍ତି ବୋଲି ମୃତ ମହିଳାଙ୍କ ବାପା-ମା’ ଅଭିଯୋଗ କରିଛନ୍ତି ।
ସେପଟେ ଭାଉଜ ଭଲ, ଘରେ କୌଣସି କଳି-ଝଗଡା ନଥିଲା ହେଲେ କାହିଁକି ସେ ଏଭଳି ଆତ୍ମହତ୍ୟା କଲେ ସେକଥା ଜଣାନାହିଁ ବୋଲି ମୃତକଙ୍କ ଦିଅର କହିଛନ୍ତି ।
