ଭୁବନେଶ୍ବର ୨୩।୨: ମୟୂରଭଞ୍ଜ ଜିଲ୍ଲା ବାରିପଦାର ପୂର୍ବତନ ବିଧାୟକ ବିମଳଲୋଚନ ଦାସଙ୍କ ଦେହାନ୍ତ ହୋଇଛି । ହୃଦଘାତ ଯୋଗୁଁ ବିମଳଲୋଚନ ଦାସଙ୍କ ପରଲୋକ ହୋଇଥିବା ଜଣାପଡିଛି । ମୃତ୍ୟୁ ବେଳକୁ ତାଙ୍କୁ ୮୬ ବର୍ଷ ବୟସ ହୋଇଥିଲା । ବାରିପଦା ସ୍ଥିତ ବାସଭବନରେ ତାଙ୍କର ଦେହାନ୍ତ ହୋଇଛି ।
ମୟୁରଭଞ୍ଜ ଜିଲ୍ଲାରେ ୧୯୩୬ ମସିହା ଅକ୍ଟୋବର ୧୧ତାରିଖରେ ଜନ୍ମଗ୍ରହଣ କରିଥିବା ବିମଳଲୋଚନ ଶୁଳିଆପଦା ବ୍ଲକ୍ ଉପାଧ୍ୟକ୍ଷ ଭାବେ ରାଜନୈତିକ ଜୀବନ ଆରମ୍ଭ କରିଥିଲେ । ବିମଳଲୋଚନ ୨୦୦୯ରୁ ୨୦୧୪ ଯାଏଁ ବାରିପଦାରୁ ବିଧାନସଭାକୁ ପ୍ରତିନିଧିତ୍ବ କରିଥିଲେ । ଝାଡଖଣ୍ଡ ମୁକ୍ତି ମୋର୍ଚ୍ଚା ଟିକେଟରେ ସେ ବିଧାୟକ ହୋଇଥିଲେ । ଏହା ବ୍ୟତୀତ ସେ ବାରିପଦା ଅର୍ବାନ୍ କୋ-ଅପରେଟିଭ ବ୍ୟାଙ୍କ ସଭାପତି ମଧ୍ୟ ଥିଲେ ବିମଳଲୋଚନ ଦାସ । ତେବେ ସେହି ସମୟରେ ବାରିପଦା ଅର୍ବାନ୍ କୋ-ଅପରେଟିଭ ବ୍ୟାଙ୍କରେ ବ୍ୟାପକ ଅର୍ଥ ହେରଫେର ଓ ଅନିୟମିତତା ଅଭିଯୋଗ ହୋଇଥିଲା । ପରବର୍ତ୍ତୀ ସମୟରେ ସେହି ମାମଲାରେ ଗିରଫ ହୋଇ ଜେଲ୍ ଯାଇଥିଲେ ବିମଳଲୋଚନ ।
ବିଧାନସଭାକୁ ଥରେ ନିର୍ବାଚିତ ବିମଳଲୋଚନ ଦାସ ପରବର୍ତ୍ତୀ ସମୟରେ ସକ୍ରିୟ ରାଜନୀତିରୁ ଦୂରରେ ରହିଥିଲେ । ବ୍ୟବସାୟରୁ ରାଜନେତା ହୋଇଥିବା ବିମଳଲୋଚନ ଦାସ କିଛି ଦିନ ସାମ୍ବାଦିକତା ମଧ୍ୟ କରିଥିଲେ । ଏହାସହ ସମାଜସେବାରେ ମଧ୍ୟ ସେ ସକ୍ରିୟ ଥିଲେ । ତାଙ୍କ ଶେଷ ଦର୍ଶନ ପାଇଁ ତାଙ୍କ ବାସଭବନରେ ବିଭିନ୍ନ ଦଳର ନେତା, ସମାଜସେବୀ ଏବଂ ଜିଲ୍ଲାର ଅନେକ ଲୋକଙ୍କ ଭିଡ ଜମାଇଥିବା ଦେଖିବାକୁ ମିଳିଛି ।
