ମସ୍କୋ ,୨୪/୦୧: ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ବ୍ଲାକ୍ ସି ଅଞ୍ଚଳରେ ୧.୪ବିଲିୟନ ଡଲାର ରେ ଏହ ପ୍ରାସାଦ ତିଆରି କରିଛନ୍ତି । ଏହାର ଡ୍ରୋନ୍ ଫୁଟେଜ୍ ଏବେ ୟୁଟ୍ୟୁବରେ ଭାଇରାଲ ହୋଇଛି । ଏହି ଭିଡିଓ ମଙ୍ଗଳବାର ଅପଲୋଡ୍ ହେବା ପରେ ଏବେସୁଦ୍ଧା ୫୪ ଲକ୍ଷ ୟୁଜର ଏହାକୁ ଦେଖିସାରିଲେଣି ।
ଏହି ୨ ଘଣ୍ଟାର ଡ୍ରୋନ୍ ଫୁଟେଜରେ ଏକ ଆଖି ଝଲସିବା ଭଳି ପ୍ରାସାଦ ରହିଛି । ଏହାସହ ଦୁଇଟି ହେଲିପ୍ୟାଡ୍ ରହିଛି । ଏହାସହ ଗେଷ୍ଟ୍ ହାଉସ୍, ବଡ ପାର୍କି ଏରିଆ ରହିଥି । ଆଲେକ୍ସାଇ ନାଭାଲନି ଏହାକୁ ୟୁଟ୍ୟୁବରେ ଅପଲୋଡ କରିଛନ୍ତି ।
ନାଭାଲନି ପୁଟିନଙ୍କ ସମାଲୋଚକ ଭାବେ ଜଣାଶୁଣା । ସେ ମସ୍କୋର ଏକ ଜେଲରେ ଅଛନ୍ତି । ପୁଟିନ ନିଜ ଧନି ବନ୍ଧୁଙ୍କଠାରୁ ଟଙ୍କା ଆଣି କାହାକୁ କିଛି ନଜଣାଇ ଏହି ପ୍ରାସାଦ ନିର୍ମାଣ କରିଥିବା ଅଭିଯୋଗ ହୋଇଛି ।
ଏହି ପ୍ରାସାଦ ୧୭୦ ଏକର ଅଞ୍ଚଳରେ ପରିବ୍ୟାପ୍ତ । ଏହି ଅଞ୍ଚଳ ଋଷ ଫେଡେରାଲ ସିକ୍ୟୁରିଟି ସର୍ଭିସର ବୋଲି ନାଭାଲନି ଅଭିଯୋଗ କରିଛନ୍ତି । ତେବେ ଋଷ ସରକାର ପୁଟିନଙ୍କ ସହ ଏହି ପ୍ରାସାଦର ସମ୍ପର୍କ ନଥିବା କହିଛନ୍ତି ।
ଋଷ ଅଧିକାରୀ କହିଛନ୍ତି ଯେ, ଏହା ସତ ନୁହେଁ । ପୁଟିନ ଏହି ସମ୍ପତ୍ତିର ମାଲିକ ନୁହଁନ୍ତି । ସବୁ ଗୁଜବ । ସୂଚନାଯୋଗ୍ୟ, ଏହି ବିଳାସମୟ ପ୍ରାସାଦରେ ୧୯୦,୦୦୦ ସ୍କୋୟାର ଫୁଟର ରହିବା ସ୍ଥାନ ଅଛି । ଏହାସହ ୨୭୦୦୦ ସ୍କୋୟାର ଫୁଟର ଗେଷ୍ଟ ହାଉସ ମଧ୍ୟ ରହିଛି । ଯାହାକୁ ୨୬୦ ଫୁଟର ଏକ ବ୍ରିଜ ସଂଯୋଗ କରୁଛି ।
