ନୂଆଦିଲ୍ଲୀ, ୨୬|୦୮: ଭାରତୀୟ କ୍ରିକେଟ୍ ଟିମ୍ ଏବେ ଏସିଆ କପ୍ ପାଇଁ ୟୁଏଇରେ ରହିଛି । ଶନିବାରଠୁ ଏହି ଟୁର୍ଣ୍ଣାମେଣ୍ଟ୍ ଆରମ୍ଭ ହେବ । ଭାରତର ଅଭିଯାନ ପାକିସ୍ତାନ ବିପକ୍ଷରେ ରବିବାରଠୁ ଆରମ୍ଭ ହେବ । ଯାହାକୁ ନେଇ ପ୍ରଶଂସକ ଖୁବ୍ ଉତ୍ସାହିତ ଅଛନ୍ତି । ଏହି ମୁକାବିଲା ଜରିଆରେ ଭାରତର ଷ୍ଟାର୍ ବ୍ୟାଟର ବିରାଟ କୋହଲି ନିଜର ପୁରୁଣା ଫର୍ମ ଫେରି ପାଇବା ନେଇ ଲକ୍ଷ୍ୟ ରଖିଛନ୍ତି । କିନ୍ତୁ ଟୁର୍ଣ୍ଣାମେଣ୍ଟ ଆରମ୍ଭରୁ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ମନେ ପକାଇଛନ୍ତି କୋହଲି ।
କୋହଲି ଧୋନୀଙ୍କ ସହ ଏକ ଫଟୋ ସେୟାର କରିଛନ୍ତି । ଯାହା ସହ ଏକ ଭାବବିହ୍ୱଳ ପୋଷ୍ଟ ମଧ୍ୟ ଲେଖିଛନ୍ତି । ଏହା ଉପରେ ନେଟିଜେନ୍ସ ମଧ୍ୟ କମେଣ୍ଟ ଦେଇଛନ୍ତି । ତେବେ କୋହଲି ଯେଉଁ ଫଟୋ ପୋଷ୍ଟ କରିଛନ୍ତି ସେଥିରେ ଧୋନୀଙ୍କ ଚେହେରା ଦେଖାଯାଉନି । କିନ୍ତୁ ତାଙ୍କ ଟି ସାର୍ଟରେ ୭ ଲେଖାଯାଇଛି । କୋହଲି ଏହି ନମ୍ବରକୁ ନିଜ ପୋଷ୍ଟରେ ମେନସନ୍ ମଧ୍ୟ କରିଛନ୍ତି ।
ରନ୍ ମେସିନ୍ ପୋଷ୍ଟରେ ଲେଖିଛନ୍ତି ଯେ, ଏହି ବ୍ୟକ୍ତି ମୋତେ ଉପ ଅଧିନାୟକ କରିଥିଲେ । ଯାହା ଖୁବ୍ ସୁଖଦ ଥିଲା । ଏହା ତାଙ୍କ କ୍ୟାରିଅରର ସବୁଠାରୁ ରୋମାଞ୍ଚିତ ମୁହୂର୍ତ୍ତ ଥିଲା । ଉଭୟଙ୍କ ମଧ୍ୟରେ ଭଲ ପାର୍ଟନରସିପ୍ ଥିଲା । ଏହାସହ ସେ ୭ ଏବଂ ୧୮ ଲେଖିଛନ୍ତି । ଅର୍ଥାତ କୋହଲିଙ୍କ ଜର୍ସି ନମ୍ବର ୧୮ ଓ ଧୋନୀଙ୍କ ୭ ।
ତେବେ ଏହି ପୋଷ୍ଟ ପରେ ଜଣେ ୟୁଜର କମେଣ୍ଟରେ ଲେଖିଛନ୍ତି ଯେ, ସେ ଭାବିଲେ କି ଏହା ଅବସର ବାବଦରେ ଏକ ପୋଷ୍ଟ୍ । ସୂଚନାଯୋଗ୍ୟ କୋହଲି ଧୋନୀଙ୍କ ନେତୃତ୍ୱରେ ୨୦୦୮ରେ ପଦାର୍ପଣ କରିଥିଲେ । ଉଭୟଙ୍କ ପାର୍ଟନରସିପରେ ଭାରତ ଅନେକ ମ୍ୟାଚ୍ ଜିତିଛି । ଧୋନୀ କୋହଲିଙ୍କ କ୍ୟାରିଅର ଗଢିବାରେ ବଡ ଭୂମିକା ନେଇଛନ୍ତି । ଧୋନୀ ତାଙ୍କ ଉପ ଅଧିନାୟକ ଦାୟିତ୍ୱ ମଧ୍ୟ ଦେଇତିଲେ । ଏହାପରେ ଅଧିନାୟକ ଭାର ପ୍ରଦାନ କରିଥିଲେ ।
