ନୂଆଦିଲ୍ଲୀ : ସୋମବାର ସୁପ୍ରିମ୍କୋର୍ଟ ଜବାହରଲାଲ ନେହରୁ ବିଶ୍ବବିଦ୍ୟାଳୟ (ଜେଏନ୍ୟୁ) ପ୍ରଶାସନକୁ ଏକ ନୋଟିସ୍ ଜାରି କରିଛନ୍ତି। ବିଶ୍ବବିଦ୍ୟାଳୟକୁ ଜଣେ ପ୍ରଫେସର ସେକ୍ସ ରୢାକେଟ୍ର ପେଣ୍ଠ ବୋଲି କହିଥିବାର କୌଣସି ଲିଖିତ ଦଲିଲ ଅଛି କି ନାହିଁ ଯାଞ୍ଚ କରି ତାହା ଜଣାଇବାକୁ କୋର୍ଟ ଆଦେଶ ଦେଇଛନ୍ତି।
ଏପରି ଏକ ଦଲିଲକୁ ନେଇ ନ୍ୟୁଜ୍ ପୋର୍ଟାଲ ‘ଦ ୱେୟାର’ରେ ରିପୋର୍ଟ ପ୍ରକାଶ ପାଇବା ପରେ ପୋର୍ଟାଲର ସମ୍ପାଦକ ଓ ସହକାରୀ ସମ୍ପାଦକଙ୍କ ବିରୋଧରେ ଆପରାଧିକ ମାନହାନି ମାମଲା ରୁଜୁ ହୋଇଥିଲା। ଏକ ମାଜିଷ୍ଟ୍ରେଟ୍ କୋର୍ଟ ଉକ୍ତ ସମ୍ପାଦକଙ୍କୁ ସମନ ଜାରି କରିଥିଲେ, ଯାହାକୁ ଦିଲ୍ଲୀ ହାଇକୋର୍ଟ ଖାରଜ କରି ଦେଇଥିଲେ। ହାଇକୋର୍ଟଙ୍କ ଏହି ଆଦେଶ ବିରୋଧରେ ଜେଏନ୍ୟୁର ସେଣ୍ଟର ଫର୍ ଷ୍ଟଡି ଅଫ୍ ଲ ଆଣ୍ଡ୍ ଗଭର୍ଣ୍ଣାନ୍ସର ଅଧ୍ୟକ୍ଷା ତଥା ପ୍ରଫେସର ଅମିତା ସିଂହ ସୁପ୍ରିମ୍କୋର୍ଟରେ ଆବେଦନ କରିଥିଲେ। ଏହାର ଶୁଣାଣି କରି ସର୍ବୋଚ୍ଚ ଅଦାଲତ ଉକ୍ତ ନୋଟିସ୍ ଜାରି କରିଛନ୍ତି। ଜଷ୍ଟିସ୍ ଏସ୍କେ କୌଲ ଓ ଜଷ୍ଟିସ୍ ସୁଧାଂଶୁ ଧୁଲିଆଙ୍କ ଖଣ୍ଡପୀଠ ଜେଏନ୍ୟୁ କୁଳପତି ଏବଂ ପୋର୍ଟାଲର ସମ୍ପାଦକ ଓ ସହସମ୍ପାଦକଙ୍କୁ ନୋଟିସ୍ ଜାରି କରି ଲିଖିତ ଦଲିଲର ସତ୍ୟାସତ୍ୟ ଜଣାଇବାକୁ ଆଦେଶ ଦେଇଛନ୍ତି।
ହାଇକୋର୍ଟ ତାଙ୍କ ରାୟରେ କହିଥିଲେ ଯେ ‘ଦ ୱେୟାର’ରେ ପ୍ରକାଶିତ ଲେଖାରେ ଅଭିଯୋଗକାରିଣୀ ଉକ୍ତ ଭୁଲ୍ କାମରେ ଜଡ଼ିତ ବୋଲି ଲେଖାଯାଇ ନାହିଁ। ତାଙ୍କ ବିରୋଧରେ କୌଣସି ଅପମାନକର ମନ୍ତବ୍ୟ ବି ନାହିଁ। ତେଣୁ ଏଥିରେ ତାଙ୍କର ମାନହାନି ହୋଇଥିବାର ପ୍ରଶ୍ନ ଉଠୁନାହିଁ।
