ନୂଆଦିଲ୍ଲୀ: ଉପନିବେଶୀୟ ଅମଳର ଦେଶଦ୍ରୋହ ଆଇନ ବା ଆଇପିସିର ଧାରା ୧୨୪ଏ ଉପରେ ସମୀକ୍ଷା ଚାଲିଛି ଏବଂ ଏହାକୁ ସଂଶୋଧନ ପାଇଁ ପାର୍ଲାମେଣ୍ଟର ଆସନ୍ତା ମୌସୁମୀ ଅଧିବେଶନରେ ଉପସ୍ଥାପିତ କରାଯାଇପାରେ ବୋଲି କେନ୍ଦ୍ର ସରକାର ସୁପ୍ରିମ୍କୋର୍ଟରେ କହିଛନ୍ତି।
ସିଜେଆଇ ଡିୱାଇ ଚନ୍ଦ୍ରଚୂଡ଼ ଓ ଜଷ୍ଟିସ୍ ଜେବି ପାର୍ଦିୱାଲାଙ୍କ ଖଣ୍ଡପୀଠ ଆଗରେ ଆଟର୍ଣ୍ଣି ଜେନେରାଲ (ଏଜି) ଆର୍ ଭେଙ୍କଟରମଣି କହିଥିଲେ ଯେ ସରକାର ଏହି ଆଇନରେ ସଂଶୋଧନ କରିବାକୁ ଚାହାନ୍ତି। ଏହି ପ୍ରକ୍ରିୟା ଏବେ ଅଗ୍ରଗାମୀ ସ୍ତରରେ ରହିଛି। ଖଣ୍ଡପୀଠ କହିଛନ୍ତି ଯେ, ଏଜିଙ୍କ ଅନୁରୋଧକ୍ରମେ ଏ ସମ୍ପର୍କିତ ମାମଲାର ଶୁଣାଣିକୁ ଅଗଷ୍ଟ ଦ୍ବିତୀୟ ସପ୍ତାହକୁ ଘୁଞ୍ଚାଇ ଦିଆଯାଇଛି।
ଉକ୍ତ ଆଇନର ବୈଧତା ନେଇ କୋର୍ଟରେ ପଡ଼ିଥିବା ଅନେକ ଆବେଦନ ଉପରେ ଆଜି ଶୁଣାଣି ହୋଇଥିଲା। ପିଟିସନରମାନଙ୍କ ତରଫରୁ ବରିଷ୍ଠ ଆଇନଜୀବୀ ଅରବିନ୍ଦ ଦାତର କହିଥିଲେ, କେଦାରନାଥ ସିଂହ ବନାମ ବିହାର ସରକାର ମାମଲାରେ ୫ ଜଣିଆ ଖଣ୍ଡପୀଠ ୧୯୬୨ର ଆଇନ ବ୍ୟବସ୍ଥାକୁ କାଏମ ରଖିଥିବାରୁ ଏହାର ଶୁଣାଣି ପାଇଁ ୭ ଜଣିଆ ବେଞ୍ଚର ବ୍ୟବସ୍ଥା କରାଯାଉ। ୨୦୨୨ ମେ ମାସରେ ସୁପ୍ରିମ୍କୋର୍ଟ କହିଥିଲେ, କେନ୍ଦ୍ର ସରକାର ଆଇନର ସମୀକ୍ଷା କରୁଥିବାରୁ ଏହି କାର୍ଯ୍ୟ ସରିବା ପର୍ଯ୍ୟନ୍ତ ଆଇନ ଉପରେ କୌଣସି କାର୍ଯ୍ୟାନୁଷ୍ଠାନ ନିଆଯାଇପାରିବ ନାହିଁ। ରାଜ୍ୟଗୁଡ଼ିକ ମଧ୍ୟ ଏହି ଆଇନ ଅନୁଯାୟୀ କୌଣସି କଠୋର ପଦକ୍ଷେପ ନ ନେବାକୁ କୋର୍ଟ ଆଦେଶ ଦେଇଥିଲେ। ଏଡିଟର୍ସ ଗିଲ୍ଡ ଅଫ୍ ଇଣ୍ଡିଆ, ଅବସରପ୍ରାପ୍ତ ମେଜର ଜେନେରାଲ ଏସ୍ଜି ବୋମ୍ବାଟକେରେ, ପୂର୍ବତନ କେନ୍ଦ୍ରମନ୍ତ୍ରୀ ଅରୁଣ ସୁରୀ ଓ ପିପୁଲ୍ସ ୟୁନିୟନ ଫର୍ ସିଭିଲ ଲିବର୍ଟିଜ୍ (ପିୟୁସିଏଲ୍) ପକ୍ଷରୁ ଆଇପିସିର ଧାରା ୧୨୪ଏର ବୈଧତାକୁ ନେଇ ପିଟିସନ ଦାୟର କରାଯାଇଥିଲା।
