ନୂଆଦିଲ୍ଲୀ,୩୧/୦୩: ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ବୁଧବାର ଚଳିତ ସିରିଜର ପ୍ରଥମ ବିଜୟ ହାସଲ କରିଥିଲା । ଫାପ୍ ଡୁପ୍ଲେସିସଙ୍କ ନେତୃତ୍ୱରେ ଦଳ କୋଲକାତା ନାଇଟ ରାଇଡର୍ସକୁ ୩ ଓ୍ୱିକେଟରେ ମାତ୍ ଦେଇଥିଲା । ମ୍ୟାଚ୍ ଜିତିବା ପରେ ଅଧିନାୟକ ଡୁପ୍ଲେସିସ୍ ଓ୍ୱିକେଟ୍ କିପର ବ୍ୟାଟର ଦିନେଶ କାର୍ତ୍ତିକଙ୍କୁ ପ୍ରଶଂସା କରିଥିଲେ । ଏପରିକି ଧୋନୀଙ୍କ ସହ ତାଙ୍କ ତୁଳନା ମଧ୍ୟ କରିଥିଲେ ।
ଡିଓ୍ୱାଇ ପାଟିଲ ଷ୍ଟାଡିୟମରେ ଖେଳାଯାଇଥିବା ଏହି ମୁକାବିଲାରେ ଆରସିବିକୁ ବିଜୟ ପାଇଁ ୧୨୯ ରନ୍ ଦରକାର ଥିଲା । ଦଳ ଅନ୍ତିମ ଓଭରରେ ମ୍ୟାଚ୍ ଜିତିପାରିଥିଲା । ଶେଷ ଓଭରରେ ଦଳକୁ ୭ ରନ୍ ଦରକାର ଥିଲା । କ୍ରିଜରେ ଦିନେଶ କାର୍ତ୍ତିକ ଥିଲେ । ସେ ଆନ୍ଦ୍ରେ ରସେଲଙ୍କ ପ୍ରଥମ ବଲରେ ଛକା ଓ ପରବର୍ତ୍ତୀ ବଲରେ ଚଉକା ମାରି ଦଳକୁ ଜିତାଇଥିଲେ । ସେ ୭ ବଲରୁ ୧୪ ରନ୍ କରି ଅପରାଜିତ ରହିଥିଲେ ।
ମ୍ୟାଚରେ ଦଳ ବିଜୟ ହେଲା ପରେ ଡୁପ୍ଲେସିସ୍ କହିଥିଲେ ଯେ, ଏହା ଏକ ଭଲ ବିଜୟ । ଅଳ୍ପ ସ୍କୋରର ପିଛା କରିବା ପାଇଁ ସକକରାତ୍ମକ ଚିନ୍ତାଧାରା ରହିବା ଦରକାର । ଶେଷ ଓଭର ଯାଏଁ ମ୍ୟାଚ୍ ଯିବା ଠିକ୍ ନଥିଲା । କେକେଆର ବୋଲରମାନେ ପ୍ରଭାବୀ ବୋଲିଂ କରିଥିଲେ । ପୂର୍ବ ମ୍ୟାଚରେ ୨୦୦ରୁ ଅଧିକ ସ୍କୋର ହୋଇଥିବା ବେଳେ ବୁଧବାର ୧୨୦ ପାଖାପାଖି ରହିଥିଲା ।
ସେ ଆହୁରି କହିଥିଲେ ଯେ, ଦିନେଶ କାର୍ତ୍ତିକଙ୍କ ଅନୁଭବ କାମ ଦେଇଥିଲା । ସେ ଶେଷ ୫ ଓଭର ମହେନ୍ଦ୍ର ସିଂ ଧୋନୀଙ୍କ ଭଳି ଖେଳିଥିଲେ । ଏହାସହ ମ୍ୟାଚକୁ ଜିତାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ ବୋଲି ଡୁପ୍ଲେସିସ୍ ପ୍ରକାଶ କରିଥିଲେ ।
